Հայտնի է դարձել, որ թիվ 34 ընտրատարածքային հանձնաժողով ամենամեծ ընտրական ցուցակը ներկայացվել է իշխող Հանրապետականի և ՔԴԿ-ի մասնակցությամբ ձևավորված նախընտրական դաշինքի կողմից. դաշինքը կրում է «Բալասանյան» անվանումը, քաղաքապետի թեկնածուն գործող քաղաքապետ Սամվել Բալասանյանն է:
Հիշեցնենք, որ մինչ այժմ Գյումրիի ՏԻՄ ընտրություններում առաջադրվել են նաև «Ալյանս», ՔՊ, ԲՀԿ, «Գալա» և «Գյումրեցու ոգի» կուսակցությունները:
Հավելենք, որ ըստ մամուլի հրապարակումների, իբև ՀՀԿ թեկնածու՝ Սամվել Բալասանյանի վրա կանգ առնելու որոշման վրա ազդել է նորաստեղծ «ԳԱԼԱ» կուսակցությունը, որն առանց այն էլ ընդդիմադիր քաղաքում կարող է լուրջ հաջողությունների հասնել։
Հիշեցնենք, որ Սամվել Բալասանյանը, ով հրապարակավ ասում էր, թե իր ճակատին ՕԵԿ է գրված, 2014-ին դուրս եկավ Օրինաց Երկիր կուսակցությունից և ՀՀԿ մտնելու դիմում գրեց, ապա Հանրապետական կուսակցությունից ոչ հրապարակային մերժում ստանալով, անդամակցեց ԲՀԿ-ին և Գյումրիի քաղաքապետ ընտրվեց ՝ որպես ԲՀԿ-ական, չնայած , ըստ ասեկոսեների, ուներ իշխանության պաշտոնական աջակցությունը։
Մեկ տարի առաջ Սամվել Բալասանյանը դուրս եկավ նաև ԲՀԿ-ից, իսկ հիմա քաղաքապետի ընտրության է մասնակցում դաշինքով՝ իբրև ՀՀԿ-ի ու ՔԴԿ-ի միասնական թեկնածու, սակայն առանց այդ կուսակցություններից որևէ մեկին անդամակցելու:
Գյումրեցիները կատակում են, որ իշխանությունն այս որոշումով օգնել է Բալասանյանին, որ իր ճակատին ոչ ՀՀԿ գրի, ոչ էլ ՔԴԿ, այլ սահմանափակվի մի բառով՝ Դաշինք...
Հեղինակ՝ Ա.Գրիգորյան
