Արցախի մարդու իրավունքների պաշտպան Ռուբեն Մելիքյանը, պաշտոնական հանդիպումից հետո, մամուլի ասուլիս է տվել Եվրախորհրդարանում՝ ԵԽ պատգամավոր Ֆռանկ Էնգելի հետ։ Սա առաջին դեպքն է, երբ Արցախը ներկայացնող պաշտոնյան, ի պաշտոնե, նման ընդունելության է արժանանում։ Իր ասուլիսում Ռուբեն Մելիքյանը անդրադարձել է 2016-ի ապրիլյան պատերազմի ընթացքում Ադրբեջանի կողմից մարդու իրավունքների խախտումներին ու, մասնավորապես ասել է.
«Մեզ` Արցախի քաղաքացիներիս համար շատ կարեւոր է լսելի լինել Եվրոպայի եւ եվրոպացի գործընկերների համար: Իմ ոլորտը մարդու իրավունքներն են, ես չեմ խոսի քաղաքականությունից: Ես հիմա խոսելու եմ բացառապես մարդու իրավունքների տեսանկյունից` չճանաչված պետության մարդու իրավունքների տեսանկյունից, քանի որ նույնիսկ ճանաչված պետության քաղաքացիները չպետք է անտեսվեն, նրանք ևս ունեն իրավունքներ: Եվրախորհրդարանում ունեցած հանդիպումներում մենք նշել ենք հատկապես ապրիլյան պատերազմի ընթացքում Ադրբեջանի կողմից մարդու իրավունքների խախտման համակարգվա’ծ բնույթի մասին: Դրա մասին վկայություններից մեկն այն է, որ ապրիլյան պատերազմի ժամանակ ադրբեջանցիների վերահսկողության տակ հայտնված Արցախի քաղաքացիների մոտավորապես 90 տոկոսը կամ խոշտանգվել էին, կամ կտտանքների ենթարկվել կամ ոչնչացվել»:
