Դեռևս Եվրասիական տնտեսական միության ստեղծման պահից քննարկվում է նաև կառույցում միասնական արժույթ ներդնելու հարցը
Ռուսաստանի Դաշնության նախագահ Վլադիմիր Պուտինը չի բացառում, որ Ռուսաստանը և Հայաստանը կարող են անցնել ազգային արժույթներով փոխհաշվարկների՝ այսինքն դրամով և ռուբլիով, և դա կնպաստի առևտրի հետագա ընդլայնմանը և բազմազանեցմանը:
Վլադիմիր Պուտինն այս մասին ասել է ՀՀ նախագահի հետ հանդիպման արդյունքներն ամփոփելիս:
Ընդ որում, դեռևս Եվրասիական տնտեսական միության ստեղծման պահից քննարկվում է կառույցում միասնական արժույթ ներդնելու հարցը:
Քաղաքական և միջազգային հետազոտությունների հայկական կենտրոնի փորձագետ Ռուբեն Մեհրաբյանի գնահատմամբ, միասնական արժույթ ստեղծելու հարցը ամենևին էլ տնտեսական զարգացման նպատակներ չի հետապնդում, սա քաղաքական հարց է` ԵԱՏՄ-ն Խորհրդային միության վերածելու պուտինյան գաղափար:
Տնտեսագետ Թաթուլ Մանասերյանի կարծիքով էլ, միասնական արժույթ ունենում են այն երկրները, որոնք կարողացել են ձևավորել տնտեսական ինտեգրացիայի բարձրագույն ՝ չորրորդ մակարդակը: Մինչ այդ պետք է ձևավորվեն. 1. ազատ առևտրի գոտին, 2. մաքսային միությունը և 3. ընդանուր շուկան: Քանի դեռ չի միասնականացված տնտեսական, սոցիալական, հարկաբյուջետային քաղաքականությունները, միասնական արժույթի անցնելը հեշտ չի լինի:
Այցի ընթացքում ՀՀ նախագահը հանդիպել է նաև ՌԴ վարչապետ Դմիտրի Մեդվեդևի հետ:
Մեդվեդևը նշել է, որ անկախ ընթացիկ բարդություններից, երկու երկրների միջև առևտրաշրջանառությունը մեծացել է: Մասնավորապես, աճել է Հայաստանից Ռուսաստան արտահանվող գյուղատնտեսական արտադրանքի քանակը: ՌԴ վարչապետի կարծիքով, Հայաստանից արտահանվող ապրանքների թվի աճը վկայում է, որ Հայաստանի ինտեգրումն արդեն բերքեր է տալիս: Ըստ էության, խոսքը հենց ԵԱՏՄ-ի անդամակցության մասին է:
