Այսօր՝ հուլիսի 17-ին, խորհրդարանում լրագրողների հետ զրույցի ժամանակ ԱԺ ԵԼՔ խմբակցության պատգամավոր Էդմոն Մարուքյանը տեղեկացրել է, որ «Լուսավոր Հայաստան» կուսակցությունը մասնակցելու է Երևանի ավագանու ընտրություններին: Իսկ թե ինչ ձևաչափով է դաշինքը մասնակցելու Երևանի քաղաքապետի ընտրություններին և ով է լինելու քաղաքապետի թեկնածուն, Էդմոն Մարուքյանը նշել է, որ դեռևս այս հարցերի շուրջ քննարկում չի եղել.
«Տարբերակները շատ են՝ կարելի է ԵԼՔ դաշինքը պահպանել և ընտրություններին մասնակցել ԵԼՔ դաշինքով, կարելի է նաև գնալ առանձին-առանձին»:
ԱԺ պատգամավորի համար նախընտրելի է միասնական ցուցակով մասնակցելը, սակայն քանի դեռ քննարկումներ չկան, հնարավոր չէ ասել, թե ինչ կլինի.
«Նախընտրելի է, որ գոյություն ունեցող ֆորմատը պահպանվի: Դա կախված է բոլորից, քանի որ բոլորս պետք է կոնսենսուսի գանք»:
Հիշեցնենք` Երևանի քաղաքապետ Տարոն Մարգարյանի հրաժարականից հետո ավագանիում ներկայացված ՀՀԿ և «Ելք» խմբակցությունները որոշեցին քաղաքապետի թեկնածու չառաջադրել, այլ գնալ արտահերթ ընտրությունների ճանապարհով:
Հուլիսի 16-ին ավագանու նիստը չկայացավ քվորումի բացակայության պատճառով: Ըստ Երևանի մասին օրենքի` ՀՀ կառավարությունն այս պարագայում պետք է որոշում կայացնի ցրել ավագանին ու նշանակել արտահերթ ընտրություններ` որոշում կայացնելու պահից 30-40 օրվա ընթացքում:
