Նոր Հայաստանում քաղբանտարկյալներ չկան եւ չեն լինելու։ Այդ մասին ասաց վարչապետ Նիկոլ Փաշինյանը, երթի ընթացքում պատասխանելով հարցին, որ ըստ երկրորդ նախագահ Ռոբերտ Քոչարյանի, նա նոր Հայաստանի առաջին քաղբանտարկյալն է լինելու։
Վարչապետը նշեց, որ փայլուն զգացողությամբ է մասնակցում երթին. «Նոստալգիկ տրամադրություն չկա։ Ինչո՞ւ։ Մենք առաջ ենք նայում, հետ չենք նայում»։
Հարցին, թե որն է այս 100 օրվա ամենակարեւոր ձեռքբերումն իր գնահատմամբ՝ Փաշինյանն ասաց. «Ամենակարեւոր ձեռքբերումն այս մթնոլորտն է, ամենակարեւոր ձեռքբերումը հաղթանակած քաղաքացին է, եւ վստահությունն է ապագայի նկատմամբ։ Դրանից ավելի կարեւոր ձեռբերում չի կարող լինել, որովհետեւ այդ ձեռքբերումը նյութական չէ եւ ոչ մի տոկոսով հնարավոր չէ հաշվել»։