Պատգամավորների վրա որևէ ճնշում չի եղել և եթե եղել է, դա ժողովրդական ճնշում է, որովհետև այսօր ԱԺ շատ պատգամավորներ հարևանների, բարեկամների, նույնիսկ իրենց ընտանիքի անդամների ճնշման ներքո են, առաջին հերթին իրենց շրջապատի «ճնշման» ներքո են:
Այս մասին այսօր լրագրողների հետ զրույցում հայտարարեց ՀՀ վարչապետ Նիկոլ Փաշինյանը՝ անդրադառնալով ՀՀԿ խմբակցության պատգամավոր Արմեն Աշոտյանի հայտարարության մասին, թե մի շարք պատգամավորների ճնշումներ են ենթարկել, և այդ պատճառով էլ նրանք հայտարարել են, որ կողմ են դեկտեմբերին արտահերթ ընտրություններ անցկացնելուն:
Նա նշեց նաև, որ ուրախ է, որ Ազգային ժողովի բազմաթիվ պատգամավորներ տեսան, լսեցին ժողովրդի ձայնը եւ անհրաժեշտ արձագանք տվեցին։
Հարցին, թե երբ է պատրաստվում հրաժարական տալ, վարչապետը պատասխանեց. «Մի քիչ հաշվարկի հարց է»:
Հիշեցնենք, որ ԱԺ մի շարք պատգամավորների միացել են դեկտեմբերին արտահերթ ընտրություններ անցկացնելու պահանջին: