Ադրբեջանի նախագահի վարչակազմի արտաքին քաղաքականության հարցերով բաժնի ղեկավար Հիքմեթ Հաջիեւը մեղադրել է ՀՀ իշխանություններին բանակցային գործընթացը խախտելու մեջ՝ մեկնաբանելով ՀՀ վարչապետ Նիկոլ Փաշինյանի հայտարարությունը Իլհամ Ալիեւի հետ կայանալիք հանդիպման օրակարգի մասին:
«Հայաստանի իշխանության հայտարարությունները բանակցությունների ձեւաչափի փոփոխության մասին ոչ այլ ինչ են, քան բանակցային գործընթացը նպատակաուղղված փակուղի տանելու, խափանելու փորձեր: Այդ ամենի պատասխանատվությունն ամբողջությամբ հայկական կողմի վրա է մնում», -ասել է Հաջիեւը «Интерфакс»-ի ադրբեջանական գործակալությանը:
Նա ընդգծել է, որ ղարաբաղյան հակամարտության կարգավորման հայ-ադրբեջանական բանակցային գործընթացի ձևաչափը հայտնի է, այն փոփոխելը քննարկման առարկա չէ ու չի էլ կարող լինել:
«Բանակցային գործընթացը տեղի է ունենում ԵԱՀԿ Մինսկի խմբի համանախագահների միջնորդությամբ հակամարտող կողմերի՝ Հայաստանի եւ Ադրբեջանի միջև», - ասել է Հաջիեւը:
Նրա խոսքերով, 2 երկրների ղեկավարների՝ Նիկոլ փաշինյանի եւ Իլհամ Ալիեւի 3 անգամյա շփումները եւ ԱԳ նախարարների միջև կայացած հանդիպումները բանակցությունների առկա ձեւաչափի վառ օրինակն են:
Հիշեցնենք, որ Թեհրանում հայ համայնքի հետ հանդիպման ժամանակ Փաշինյանը հայտարարել էր, որ կառավարության առաջնային խնդիրներից մեկը բանակցային գործընթացում Ղարաբաղի սուբյեկտության բարձրացումն է: Նա նշել էր, որ նախատեսում է ոչ օրակարգային հանդիպում անցկացնել Ադրբեջանի նախագահի հետ, որի գլխավոր ուղղությունը կլինի բանակցային ձևաչափի քննարկումը:
Աղբյուր՝ armtimes.com
Կարդացեք նաև՝ Ժողովրդի ուժով հասել ենք կառավարական կարգավիճակի, որ մեր հայրենիքի ու ժողովրդի դեմ գործե՞նք. Փաշինյան