Արդեն տեղեկացրել ենք, որ Նիկոլ Փաշինյանի մոտ այսօր քննարկվել է կառավարության անելիքները 1988 թվականի աղետալի երկրաշարժի հետևանքների վերացման կապակցությամբ:
Իր խոսքում վարչապետը նշել է, որ նպատակը ոչ միայն աղետի գոտին վերացնել է՝ տնակ-բնակարան տրամաբանության մեջ, այլև հարցը դիտարկել քաղաքաշինական զարգացման հեռանկարի մեջ:
«Ընդհանուր առմամբ ուզում եմ ասել, որ մեզանում , կարծես, թե այդքան էլ ընկալված չէ, բայց քաղաքաշինություն ունի շատ խորը բովանդակային նշանակություն, որն, ի վերջո, ստեղծում է հանրային մտածողության ձևերը,մոդելները, ֆորմաները:
Ես, օրինակ, համոզված եմ, որ մեր ժողովրդի համար մեծագույն նշանակություն է ունեցել Հայաստանում Ալեքսանդ Թամանյանի գործունեությունը, որի արդյունքում դրվել է նաև քաղաքակրթական որոշակի վեկտոր և այդ քաղաքակակրթական վեկտորն է այսօր դրված մեր այսօրվա իրականության հիմքում: Պատահական չեմ համարում նաև, որ Հայաստանում տեղի ունեցած ոչ բռնի, թավշյա, ժողովրդական հեղափոխության էպիկենտրոնը դարձավ Ալեքսանդր Թամանյանի ստեղծած Հանրապետության հրապարակը...Եվ սա ես ասում եմ առանց չափազանցության »: