▲ Դեպի վեր

lang.iso lang.iso lang.iso

Ռուսաստանի, Վրաստանի, Հայաստանի և Իրանի էներգացանցերի միավորումը կարելի է ավարտել 2-3 տարում. Ավինյան

ՀՀ փոխվարչապետ Տիգրան Ավինյանը կարծում է, որ ցանկության դեպքում Ռուսաստանի, Վրաստանի, Հայաստանի և Իրանի էներգահամակարգերը հնարավոր է միավորել 2-3 տարվա ընթացքում: Ինչպես փոխանցում է ՌԻԱ Նովոստին, այս մասին ՀՀ փոխվարչապետը խոսել է Նյու Յորքում:

«Մենք հիմա բարձրավոլտ գծեր ենք կառուցում Վրաստանի և Իրանի հետ: Ամբողջ տրամաբանությունն այն է, որ մենք Վրաստանի, Իրանի և Ռուսաստանի հետ սինխրոն ցանց ունենանք: Այդ համագործակցությունը շատ կարևոր է: Հիմա մենք ցանկանում ենք ստեղծել համակարգ, որը թույլ կտա Ռուսաստանի հետ սինխրոն աշխատել, կամ էլ փոխակերպել հաճախականությունը, որպեսզի կարողանանք կապված լինել»,-ասել է Ավինյանը:

Փոխվարչապետի խոսքերով, ցանցերի միավորման իմաստն այն է, որ լինի գլոբալ շուկա և գլոբալ էներգետիկ ենթակառուցվածք. «Եթե ինտենսիվ աշխատենք, 2-3 տարի անց դա տեղի կունենա»,-ասել է Ավինյանը՝ պատասխանելով հարցին, թե երբ տեղի կունենա համակարգերի միավորումը:

Կառավարությունից էլ ներկայացրել են  ՀՀ փոխվարչապետ Տիգրան Ավինյանի ելույթը «Մարդկանց հնարավորությունների ընդլայնումը և ներառականության ու հավասարության ապահովումը» վերնագրով ՄԱԿ-ի Կայուն զարգացման հարցերով բարձր մակարդակի քաղաքական ֆորումին

 

Ձե՛րդ գերազանցություններ,
Հարգելի՛ պատվիրակներ,
Տիկնայք և պարոնայք,

Ցանկանում եմ շնորհավորել Ձեզ, պարո՛ն նախագահ, այս տարվա Բարձր մակարդակի քաղաքական ֆորումի գերազանց կազմակերպման և մտքերի հիմնարար փոխանակման համար: Հայաստանը պատրաստակամ է իր ներդրումը բերել ֆորումի շրջանակներում ընթացող քննարկումներին, որն ընկալում ենք որպես առանցքային հարթակ՝ լավագույն փորձով կիսվելու, գաղափարներով փոխանակվելու, ինչպես նաև կայուն զարգացման նպատակների իրագործման համար նոր լուծումներ ու համագործակցության ձևաչափեր ստեղծելու համար:

Անցած տարի Հայաստանը ներկայացրեց կայուն զարգացման նպատակների իրագործման ընթացքն ամփոփող իր առաջին կամավոր ազգային զեկույցը` առանձնակի անդրադարձ կատարելով նորարարության, ստեղծագործ կրթության և ներառական համագործակցության հավելյալ արժեքին: Մեկ տարի անց` մեր երկիրը, անցնելով խաղաղ փոխակերպման միջով, կյանքի է կոչում հեռահար և համապարփակ բարեփոխումների օրակարգ: Անցած տարվա ապրիլ-մայիս ամիսներին տեղի ունեցած Թավշյա խաղաղ հեղափոխությանը հաջորդած դեկտեմբեր ամսվա արտահերթ խորհրդարանական ընտրությունները կարևորագույն քայլ էին ամուր և կայուն ժողովրդավարական համակարգ կառուցելու առումով:

Հայաստանի կառավարությանը տրվել է երկրում մեկնարկած քաղաքական ու տնտեսական փոխակերպումները շարունակելու լայն մանդատ, և մենք հաստատակամ ենք քայլեր ձեռնարկել Հայաստանում «խելացի» զարգացման օրակարգը առաջ մղելու նպատակով՝ ուշադրության կենտրոնում պահելով լավ կառավարումն ու ազգային տաղանդը որպես զարգացման շարժիչ ուժ դիտարկող քաղաքականությունը:

Կայուն զարգացման խթանման համատեքստում Հայաստանի կառավարության կողմից ռազմավարական առաջնահերթություններ են դիտարկվում տեղեկատվական և հաղորդակցության տեխնոլոգիաները, ստարտափների աճին նպաստելը, նորարարությունների խթանումն ու երիտասարդների հմտությունների և գործարար ջիղի զարգացմանն աջակցելը` ուշադրության կենտրոնում պահելով վերընթաց նախաձեռնություններն ու ձեռներեցության և հանրօգուտ ներդրումների խթանմանն ուղղված համագործակցության լավագույն օրինակները:
Հաշվի առնելով կուտակված դրական փորձը՝ թե՛ երկրի ներսում, թե՛ աշխարհում, հանձնառու ենք շարունակել «խելացի զարգացման» օրակարգի խթանմանն ուղղված համագործակցությունը` վերջինս դիտարկելով որպես ռազմավարական գերակայություն:

Այս համատեքստում ուրախ եմ նշել, որ այս տարի Հայաստանը հյուրընկալելու է Տեղեկատվական տեխնոլոգիաների համաշխարհային կոնգրեսի 23-րդ համաժողովը, որը սեղանի շուրջ կհավաքի ոլորտի նշանավոր ղեկավարների, քաղաքականություն մշակողների, գիտնականների և նորարարների, որոնք քննարկումներ կծավալեն ոլորտի և աշխարհի կարևորագույն խնդիրների շուրջ ինչպիսիք են արհեստական բանականությունը, կիբեռանվտանգությունը, ՏՀՏ-ի դերը կրթության մեջ, կանայք տեխնոլոգիաների ոլորտում և գլոբալ հետաքրքրություն ներկայացնող շատ այլ հարցեր։ Մենք ցանկանում ենք հրավիրել բոլոր շահագրգիռ կողմերին՝ մասնակցելու այս կարևոր իրադարձությանը, որը տեղի կունենա հոկտեմբերի 6-ից 9-ը` Երևանում։

Պարո՛ն նախագահ,
Հանդիսանալով միջին եկամուտ ունեցող և դեպի ծով ելք չունեցող զարգացող երկիր, և տեղակայված լինելով աշխարհի՝ սեյսմիկ առումով առավել ակտիվ տարածաշրջաններից մեկում, Հայաստանը լավ է գիտակցում շրջակա միջավայրի մարտահրավերներն ու բնական աղետների ռիսկերը, ինչպես նաև հասարակությունների վրա դրանց ազդեցության նշանակությունը։ Հասկանալով բնապահպանական և տնտեսական խնդիրների փոխկապվածությունը` Հայաստանի կառավարությունը կարևորում է տնտեսական և բնապահպանական քաղաքականությունների ինտեգրումը։ Մենք համոզված ենք, որ լավագույն տնտեսական որոշումները ընդունվում են այն դեպքում, երբ հաշվի են առնվում բնապահպանական հայեցակետերը։

Ուրախ եմ արձանագրել, որ Հայաստանը էական դրական փորձ է կուտակել՝ ծրագրեր իրականացնելով էներգետիկ արդյունավետության ու կլիմայական փոփոխությունները հաշվի առնող տեխնոլոգիաների ոլորտներում՝ նպատակ ունենալով կրճատել արտանետումները և ապահովել կլիմայական փոփոխությունների հանդեպ դիմացկուն և կայուն զարգացում:

Շնորհակալություն։

Վերահրապարակումներում` մտքերն ու ինֆորմացիան կարող են չհամընկնել խմբագրության տեսակետի հետ: Ձեր տեսակետը կամ հերքումը կարող եք ուղարկել info@asekose.am-ին
Քաղաքականություն ավելին