Հայտնի կինոռեժիսոր Էլդար Ռյազանովի մտերիմ ընկերներից մեկը` հեռուստալրագրող ու պրոդյուսեր Իռենա Լեսնևսկայան, խոսել է իր ընկերոջ վերջին օրերի մասին: Այս մասին հայտնում է kp.ru-ն:
Ըստ Լեսնևսկայայի` իրենք հանդիպել էին մոտ երկու շաբաթ առաջ Ռյազանովի ամառանոցում, լուսանկարվել, ինչից հետո ռեժիսորն ասել է, որ դա իր վերջին լուսանկարն է: Լեսնևսկայան առարկել է Ռյազանովին` պնդելով, որ վերջինս պետք է պայքարի և ուրախանա ամեն օրվա առթիվ, սակայն ռեժիսորը պատասխանել է, որ գրեթե չի տեսնում, չի լսում, չի քայլում և ուրախանալու առիթ չունի: Հեռուստալրագրողի կարծիքով` Ռյազանովը փիլիսոփայորեն էր մոտենում իր մահվանը:
Հատկանշականն այն է, որ մահվանից առաջ Ռյազանովի մոտ ցանկություն էր առաջացել վերանայելու իր նկարահանած վավերագրական հաղորդաշարերը, արվեստագետների հետ հարցազրույցներն ու լեգենդար ֆիլմերը, որոնց վերաբերվում էր սեփական երեխաների պես:
Լեսնևսկայան հավելել է, որ նախկինում Ռյազանովը չէր սիրում դիտել իր նկահարանած ֆիլմերն ու հեռուստանախագծերը, սակայն մահվանից առաջ նրա մոտ ինչ-որ բան էր փոխվել։
Հիշեցնենք, որ ԽՍՀՄ ժողովրդական արտիստ, կինոռեժիսոր Էլդար Ռյազանովը կյանքից հեռացել է երեկ` նոյեմբերի 30-ին: Նա 88-րդ տարեկան էր: Նշվում է, որ ռեժիսորը նոյեմբերի 21-ին հոսպիտալացվել էր, մինչ այդ էլ այս տարվա ընթացքում մի քանի անգամ բուժում է ստացել հիվանդանոցում: Վերջին անգամ հիվանդանոց էր տեղափոխվել արյան շրջանառության սուր խախտում ախտորոշմամբ: