Mediametrics.ru-ին տված հարցազրույցում ասել է ՌԴ իշխանությունների նախաձեռնությամբ ստեղծված «Վալդայ» էլիտար ակումբի փորձագետ, ՌԴ Գիտությունների ակադեմիայի Միջազգային անվտանգության խնդիրների ինստիտուտի առաջատար գիտաշխատող, Լոմոնոսովի անվան Մոսկվայի պետական համալսարանի համաշխարհային քաղաքականության ֆակուլտետի դոցենտ Ալեքսեյ Ֆենենկոյի խոսքով, ապրիլյան սրացումը ղարաբաղյան ճակատում վերջնականապես թաղեց ԼՂ խնդրի կարգավորման Մադրիդյան սկզբունքները: Այժմ Ռուսաստանը, մեջբերում ենք` «սկսում է կիսել բանակցային գործընթացը երեք մասի. առանձին կխոսենք Ղարաբաղի, առանձին`5 շրջանի, առանձին`ևս երկու շրջանի մասին (խոսքը Բերձոր-Լաչինի և Քարվաճառ-Քելբաջարի մասին է –Վ.Ա.): Այսինքն մենք կունենանք բանակցային երեք առանձին փաթեթ: Սա է ղարաբաղյան հարցում նաև Ռուսաստանի ներկայիս ռազմավարության էությունը» (չափազանց հետաքրքիր է «նաև» բառը –Վ.Ա.):
«Ռուսաստանի պաշտոնական դիրքորոշումը ավելի մոտ է Ադրբեջանի, քան հայկական կողմի դիրքորոշմանը: Այն բաղկացած է նույնպես երեք մասից. 1. Մենք ճանաչում ենք Ադրբեջանի տարածքային ամբողջականությունը եւ գտնում ենք, որ Լեռնային Ղարաբաղը պաշտոնապես Ադրբեջանի մասն է; 2. Մենք դեմ ենք խնդրի ռազմական կարգավորմանը; 3. Հայաստանի համար նախատեսված ՌԴ եւ ՀԱՊԿ անվտանգության երաշխիքները չեն տարածվում Լեռնային Ղարաբաղի վրա: Դրանում համոզվելու համար բավական է ընթերցել Ռուսաստանի ԱԳՆ-ի բոլոր հայտարարությունները նշյալ թեմայի շուրջ», - ասել է ռուս փորձագետը:
Ըստ Ֆենենկոյի, Մոսկվայում աճում է դժգոհությունը Սերժ Սարգսյանից:
«Բայց եթե մենք մշտապես ճնշում գործադրենք Հայաստանի վրա, Հայաստանը պարզապես «կպայթի» եւ մենք կստանանք հակառուսական ևս մեկ պետություն», - նշել է «Վալդայ» ակումբի փորձագետը: Այնուամենայնիվ, Մոսկվան, Ֆենենկոյի պնդմամբ, ավելի մեծ ճնշում է բանեցնում Հայաստանի, քան Ադրբեջանի վրա: Mediametrics-ի այն հարցին, թե ինչու ղարաբաղյան բանակցություններն անցնում են ամենախիստ գաղտնիության ռեժիմում, ինչու մանրամասներ չեն հրապարակվում, «Վալդայ» ակումբի փորձագետը պատասխանել է, թե «Ռուսաստանում շատ են վախենում Հայաստանի տաք գլուխներից»: Բացի այդ, ՌԴ իշխանություններին մտահոգում է ռուսական հասարակության հնարավոր դժգոհությունը, որը կարող է մեղադրել Կրեմլին հերթական դաշնակցին դավաճանելու մեջ: Հետեւաբար ցանկացած կոնկրետություն, ցանկացած մանրամասնության հրապարակում, ըստ պրն. Ֆենենկոյի, կարող է «պայթեցնել» իրավիճակը: Նրա հաշվարկներով, բանակցային գործընթացը ԼՂ խնդրի շուրջ պետք է հստակեցվի մինչև 2017 թ. փետրվար-մարտ ամիսները: Մինչ այդ մեծ ցնցումների ղարաբաղյան ճակատում, ըստ ամենայնի, պետք չէ սպասել...
Վահրամ Աղաջանյան
Լուսանկարում՝ ռուս փորձագետ Ալեքսեյ Ֆենենկոն է
