Դիտեք նաև՝
«Առավոտ» օրաթերթը հարցազրույց ունի «Սյունյաց Արծիվների» նախագահ Խաչիկ Ասրյանի հետ` նորանշանակ վարչապետի մասին
– Պարոն Ասրյան, Դուք որպես պետական և ազգային դաշտում գործող, հասարակական կյանքում ճանաչված գործիչ՝ ի՞նչ կարծիք ունեք Հայաստանի Հանրապետության նորանշանակ վարչապետ Կարեն Կարապետյանի գործունեության մասին: Ճանաչո՞ւմ եք նորանշանակ վարչապետին:
– Այո՛, իհարկե, ճանաչում եմ: Վարչապետ Կարեն Կարապետյանին ես ճանաչել եմ Սյունիքում «Սյունյաց Արծիվներ»-ի հայրենասիրական լայնածավալ գործունեություն իրականացնելու ժամանակներից: Իմ կողմից գրված 150-ից ավելի պատգամներից մեկն ասում է. «Արդարությունն առանց ճշմարտության արդարություն չէ, և հակառակը՝ ճշմարտությունն առանց արդարության ճշմարտություն չէ: Բայց շատ դեպքերում այս երկու արժեքներին հաղթելու համար առաջ է գալիս անհրաժեշտությունը, որն անպարտելի է»: Երկիր մոլորակում տեղի ունեցող աշխարհաքաղաքական սրընթաց փոփոխությունների, ֆինանսատնտեսական վայրիվերումների ժամանակ, այո՛, Կարեն Կարապետյանը Հայաստանի Հանրապետության կառավարության համար անհրաժեշտություն էր Հայաստանի Հանրապետության վարչապետի պաշտոնում նշանակվելու համար:
Իմ խորին համոզմամբ՝ այդ նշանակումը Հայաստանի Հանրապետության նախագահ Սերժ Սարգսյանի կողմից կատարված հերթական իմաստուն որոշումն էր: Շատ շատերը Կարեն Կարապետյանին ներկայացնում են ընդամենը որպես լավագույն մենեջերի, լավագույն կառավարչի: Բայց ես պարտադիր ուզում եմ նշել գլխավորը, որ Կարեն Կարապետյանը խարիզմա ունեցող կերպար է, հայրենասեր տեսակի հայորդի: Ավելին՝ շողոքորթող ու բանսարկու կյանքով ապրող անպիտան մարդկանց արհամարհող տեսակ է Կարեն Կարապետյանը: Ավելի քան վստահ եմ, որ եթե հայ մարդու երակներում հոսում է հայրենասերի արյունը, ապա այդ մարդը գործում է՝ բացառապես անելով ամեն ինչ հանուն հայոց պետականության անընդհատ հզորացման:
– Ի՞նչ կասեք նոր ձևավորվող կառավարության մասին:
– Ոչինչ, քանի որ այն դեռ ձևավորված չէ:
Հեղինակ՝ Նելլի Գրիգորյան
