«Հայրենիք-սփյուռք» ՊՈԱԿ-ի տնօրենը պատրաստակամություն է հայտնել 100 միլիոն դրամ վերադարձնել պետբյուջե»,-լրագրողների հետ հանդիպմանն այսօր տեղեկացրել է ՀՀ պետական վերահսկողության ծառայության պետ Դավիթ Սանասարյանը: Հիշեցնենք, որ Սփյուռքի նախարարությանը պատկանող վերոնշյալ ՊՈԱԿ-ի նախկին տնօրենը Դավիթ Շահբազյանն է:
ՊՈԱԿ-ում չարաշահումների դեպքերով օրերս քրեական գործ է հարուցվել: «Մասնավորապես, ունենք դեպք, երբ Սփյուռքի նախարարությունը հանձնարարել է 70 միլիոն դրամ փոխանցել «Հանրային» հեռուստաընկերությանը՝ ֆիլմեր նկարահանելու համար, բայց դրանք նկարվել են «Հանրայինի» միջոցներով: Իսկ թե ուր է գնացել այդ գումարը, կպարզեն իրավապահները:
Այսինքն, երկու տեղից նույնքան գումար է իբր ծախսվել»,-նկատեց Դավիթ Սանասարյանը:
Նրա խոսքով՝ «Հանրային» հեռուստաընկերությունը ՊՎԾ-ին արդեն իսկ տվել է տեղեկանք, որ իր միջոցների հաշվին են ֆիլմերը նկարահանվել. «Հուսամ՝ Սփյուռքի նախկին նախարարն իրավապահներին կհայտնի, թե ինչպես է դա պատահել»:
Ըստ Asekose.am-ի ունեցած տեղեկությունների, խոսքը վերաբերում է Ռաֆայել Հովհաննիսյանի «Օտար, ամայի ճամփեքի վրա», «Մերոնք» և «Հայաստանի ճամփեքով» հեռուստանագծերին: Իսկ Սփյուռքի նախարարության փոխանցումներն արվել են Ռաֆայել Հովհաննիսյանի ղեկավարած «Համահայկական աշխարհագրական ասոցիացիա»-ին:
Asekose.am-ը պատրաստ է թեմայի վերաբերյալ ներկայացնել Ռաֆայել Հովհաննիսյանի կարծիքը, տեսակետը կամ հերքումը:
