«Երվանդ Մանարյանի մոտ կոտրվածք է, վաղը վիրահատելու են և հուսանք, որ ամեն ինչ լավ կլինի,- Asekose.am-ին ասաց գրող, երգահան Քրիստ Մանարյանը` անդրադառնալով տեղեկությանը, որ ՀՀ վաստակավոր արտիստ, դերասան, սցենարիստ ռեժիսոր Երվանդ Մանարյանին տեղափոխել են հիվանդանոց։
Նրա խոսքով` Երվանդ Մանարյանի կոտրվածքն առաջացել է ընկնելու հետևանքով, սակայն արտիստի տրամադրությունը լավ է.
«Երբեք իր մասին չի մտածում, միշտ անհանգստանում է մյուսների մասին, հետաքրքրվում է թատրոնով, քաղաքով, թե ինչով ենք զբաղված, երեխաներն ինչպես են, շարունակում է ակտիվորեն ապրել իր հետաքրքրություններով»:
Քրիստ Մանարյանը չցանկացավ կանխատեսումներ անել բուն վիրահատության մասին` նշելով, որ, ամեն դեպքում, տարիքից ելնելով` ռիսկային գործոններ կան:
Հավելենք, որ Երվանդ Մանարյանի` հիվանդանոցում գտնվելու մասին առաջինը հայտնել էր նրա թոռնուհին՝ Լիլիթ Մանարյանը: Նա առողջություն է մաղթել պապիկին:
«Պապիկ ջան, հուսով եմ՝ շուտ կապաքինվես ու հիվանդանոցում երկար չես մնա... ու ամեն ինչ լավ կլինի... առողջություն քեզ, քեզ շատ-շատ-շատ ենք սիրում»,- գրել է նա:
Asekose.am-ը առողջություն է մաղթում Երվանդ Մանարյանին:
