Life.panorama.am-ը գրում է.
Այս օրերին հայկական շոու բիզնեսում տոնական տրամադրություն է տիրում: Սեպտեմբերի 26-ին՝ Սոչիում, արդեն երկրորդ անգամ կայացավ «Տարվա երգ» մրցանակաբաշխությունը, որտեղ հրավիրված բոլոր աստղերը մրցանակով են վերադառնում տուն: Մրցանակաբաշխության էությունը կայանում է նրանում, որ հրավիրվում են բոլոր այն երգիչ-երգչուհիները, որոնց այս կամ այն երգը տարվա ընթացքում ամենաշատն է սիրվել: «Տարվա երգ» մրցանակաբաշխության մասին զրուցել է գլխավոր ռեժիսոր Գրիգոր Գասպարյանի հետ:
«Պետք է ասեմ, որ արդեն երկրորդ անգամ «Տարվա երգ» մրցանակաբաշխությունն անցել է բուռն, ուրախ ու հիշարժան: Անցյալ տարի մրցանակբաշխությունը կայացել էր մայիս ամսին, եւ այս տարի եւս նախատեսում էինք այդ ամսին իրականացնել միջոցառումը, սակայն երկրում տեղի ունեցած փոփոխությունների պատճառով՝ մրցանակաբաշխությունը տեղափոխեցինք սեպտեմբերին: Իհարկե, սկզբում մտահոգվում էինք, թե եղանակն ինչպիսին կլինի եւ կկարողանանք արդյոք բացօթյա դահլիճում այն անցկացնել, բայց ուրախությամբ պետք է ասեմ, որ անգամ եղանակն էր հրաշալի: Գլխավորը դահլիճում տրամադրությունը ջերմ էր, մարդիկ էլ արդեն ավանդույթի նման ամեն տարի սպասում են այս մրցանակաբաշխությանը»,- պատմեց Գրիգորը:
Ռեժիսորը կարեւորեց.
«Մեզ մոտ տրամադրությունը միշտ շատ ջերմ է, քանի որ երգիչները մրցապայքարի մեջ չեն մտնում: Բոլորն էլ ստանում են մրցանակ՝ համապատասխան արձանիկի տեսքով: Մենք ունեինք մոտ 32 կատարողներ, որոնց երգերը վերջին մեկ տարվա ընթացքում ամենաշատն են հնչել ու սիրվել: Իհարկե, նրանց շարքում կային նաեւ աստղեր, որոնց տվյալ երգը գուցե զիջում էր իր դիտումներով ու ցուցադրություններով, բայց չէինք կարող դրանք չներառել: Այդ շարքում գլխավորը Հայկոյի «Երեւան» երգն էր, որով էլ ավարտեցինք միջոցառումն ու երգը նվիրեցինք Երեւանի 2800-ամյակին: Մենք ամեն կերպ փորձում ենք որակյալ երաժշտություն ցույց տալ՝ անկախ հանդիսատեսի երաժշտական ճաշակից»:
Գրիգոր Գասպարյանի փոխանցմամբ՝ միայն դիտումների քանակով չեն ընտրվում մասնակիցնեը: Ողջ տարվա ընթացքում նրանց թիմը՝ «Պոզիտիվ փրոդաքշենը» եւ «Արմենիա TV»-ին, հետեւում են երգիչների աշխատանքին, հաշվի առնում, թե նրանց տեսահոլովակներին ինչպես են արձագանքում մարդիկ, ինչ հաճախականությամբ է ցուցադրվում հեռուստաընկերություններով: Նաեւ նշանակություն են տալիս այն բոլոր նամակներին, որոնք ուղղվում են իրենց կազմակերպությանը:
Մրցանակաբաշխությանը որպես հատուկ հյուր հրավիրված են եղել ՀՀ Վաստակավոր արտիստ Ջիվան Գասպարյանը եւ Ավրաամ Ռուսոն:
Գրիգոր Գասպարյանը նախորդ տարի Նազենի Հովհաննիսյանի հետ միասին նաեւ վարում էր այս միջոցառումը, բայց այս անգամ որոշել է միայն կատարել գլխավոր ռեժիսորի ու պրոդյուսերի աշխատանքը: Այնպես որ Նազենիին այս տարի ընկերակցել է Վաչե Թովմասյանը:
Նյութն ամբողջությամբ՝ սկզբնաղբյուր կայքում
