Միջազգային օլիմպիական կոմիտեն հայտարարել է Պեկինի և Լոնդոնի օլիմպիական խաղերին մասնակցած 8 մարզիկների որակազրկման մասին:
Դոպինգ թեստերի վերաստուգման արդյունքում արգելված խթանիչ է հայտնաբերվել նաև 2012 թվականի Լոնդոնի օլիմպիական խաղերում Հայաստանը ներկայացրած ծանրորդ Նորայր Վարդանյանի մոտ: Հայ ծանրորդը օլիմպիական խաղերում զբաղեցրել էր 11-րդ հորիզոնականը:
Նշենք, որ Նորայր Վարդանյանը օլիմպիական չեմպիոն Յուրի Վարդանյանի որդին է:
Լոնդոնի օլիմպիական խաղերի մասնակիցներից որակազրկվել են նաև թուրք ծանրորդուհի Սիբել Սիմսեկը, որը զբաղեցրել էր 4-րդ հորիզոնականը և Ադրբեջանը ներկայացնող ծանրորդ Ինտիգամ Զաիրովը:
Պեկինի օլիմպիական խաղերի դոպինգ թեստերի վերստուգման արդյունքում որակազրկվել են Չինաստանը ներկայացնող օլիմպիական չեմպիոններ Ցաո Լեյը, Չեն Սեսյան, Լյու Չունխունը (բոլորը ծանրամարտ), ինչպես նաև Բեռալուսը ներկայացնող աթլետներ Նադեժդա Օստապչուկը և Դարյա Պչելնիկը, որոնք համապատասխանաբար զբաղեցրել էին 3-րդ և 4-րդ հորիզոնականները:
