▲ Դեպի վեր

lang.iso lang.iso lang.iso

ԵՊՀ ավելի քան 70 աշխատակիցներ մայիսի 1-ից դառնալու են գործազուրկ

Asekose.am-ի խմբագրությունը նամակ է ստացել` կապված ԵՊՀ-ում տիրող վիճակի հետ, որը ներկայացնում ենք ստորև.

«Ցանկանում ենք տեղեկացնել, որ մենք՝ ԵՊՀ անվտանգության համակարգի աշխատակիցներս, ովքեր բարեխղճորեն կատարում են իրենց վրա դրված՝ ԲՈՒՀ-ի անվտանգությունն ապահովելու բոլոր պարտականությունները, սույն թվականի մայիսի 1-ից դառնալու ենք գործազուրկ: Գործընթաց, որը իրականացվում է ԵՊՀ աշխատակազմի ղեկավար Ալիկ Ղարիբյանի թեթև ձեռամբ և ԵՊՀ ռեկտոր Արամ Սիմոնյանի հովանավորչությամբ: Իսկ խնդիրը նրանում է, որ ԵՊՀ-ում որոշում է կայացվել մասնավորեցնել ԲՈՒՀ-ի անվտանգության համակարգը, որի արդյունքում ԲՈՒՀ-ի անվտանգությունը կվստահվի ինչ-որ մասնավոր ընկերության, իսկ մենք՝ ԵՊՀ անվտանգության ներկայիս աշխատակիցները, մնալու ենք առանց մեր աշխատանքի՝ որով մի կերպ պահում ենք մեր ընտանիքները, դառնալով գործազուրկ: Ի դեպ, մեզ արդեն տրվել են համապատասխան ծանուցումներ ԲՈՒՀ-ի ռեկտոր Արամի Սիմոնյանի ստորագրությամբ և ԲՈՒՀ-ի կնիքով (տես կից նկարը), որով մեզ պաշտոնապես ծանուցվում է, որ մենք՝ ԵՊՀ անվտանգության համակարգի ավելի քան 70 աշխատակիցներս, մայիսի 1-ից դառնալու ենք գործազուրկ, այլ կերպ ասած, ԲՈՒՀ-ի ռեկտոր Արամ Սիմոնյանը անձամբ մեզ բոլորիս տեղելացնում է, որ մենք մայիսի 1-ից չենք աշխատելու ԵՊՀ-ում:Աշխատանքը շարունակելու համար ԵՊՀ-ի կողմից մեզ առաջակվում են այնպիսի պայմաններ, որը, այլ կերպ ասած, նշանակում է կոռեկտ ձևով մեզ հասկացնել, որ մենք ինքներս դուրս գանք աշխատանքից: Մասնավորապես, եթե այսօր մեր աշխատավարձը կազմում է միջինում 80 000 դրամ, ապա ԵՊՀ-ի անվտանգության համակարգի մասնավորեցումից հետո մեզ առաջարկվում է շարունակել աշխատել բուհում, սակայն արդեն ընդամենը 55 000 – 60 000 դրամ աշխատավարձով, ինչը շատ ավելի ցածր է մեր ներկայիս աշխատավարձից:Սակայն նույնիսկ նման պայմաններում աշխատելու համար էլ պահանջվում է համապատասխան սերտիֆիկատ ստանալ նույն մասնավոր ընկերությունից, որը ստանձնելու է ԵՊՀ-ի անվտանգության ապահովումը, որի համար, իր հերթին, մեզանից յուրաքանչյուրը պետք է վճարի 25 000 դրամ: Մասնավորեցումից հետո չի լինելու նաև 13-րդ աշխատավարձ, իսկ արձակուրդները լինելու են մեր հաշվին: Ահա այսպիսի պայմաններ են առաջարկվում մասնավորեցումից հետո: Այս մասին արդեն իսկ գրվել և բարձրաձայնվել է մի շարք կայքերով և լրատվամիջոցներով, սակայն այդ գործըթնացը ԵՊՀ-ում կանգ չի առել և շարունակվում է : Խնդրում և պահանջում ենք կասեցնել այս գործընթացը և թույլ չտալ Հայաստանի Հանրապետությունում առկա գործազուրկների առանց այն էլ ստվար բանակը համալրել ևս 70 հոգով: Մենք բարեխղճորեն կատարում ենք մեր բոլոր պարտականությունները և պատրաստ ենք հետայսու ևս կատարել մեր պարտականությունները, ուստի կամայական որոշումներով մեզ հանպատրաստից գործազուրկ դարձնելը համարում ենք ապօրինի: Առաջարկում ենք նաև գալ և տեղում ծանոթանալ իրավիճակին, իսկ թե ովքեր են ներկայացնում նոր կազմակերպությունը և ինչո ՞ւ են հենց իրենք հաղթել ԵՊՀ-ի մրցույթում, կարող եք արդեն ինքներդ ստուգել և պարզել»,-ասված է նամակում:

Վերահրապարակումներում` մտքերն ու ինֆորմացիան կարող են չհամընկնել խմբագրության տեսակետի հետ: Ձեր տեսակետը կամ հերքումը կարող եք ուղարկել info@asekose.am-ին
Հասարակություն ավելին