Նախավերջին ապրիլի 24-ը
Կայքը մեկը տեղեկացրել է Ղազախստանում ապրիլի 24-ի սգո արարողության արգելելու և Ալմա-Աթայի Սբ.Կարապետ եկեղեցու տարածք հայ համայնքի մուտքը ոստիկանների կողմից փակելու մասին: Սույն խայտառակության նախաձեռնողն է համայնքի ղեկավար ոմն Արտյուշա Կարապետյանը, որը, փաստորեն Սբ.Կարապետից էլ «սուրբ» եւ հզոր է, քանի որ «կապեր» ունի Ղազախստանի նախագահ Նազարբաեւի հետ:
Վերջինս էլ հայտնի է Ադրբեջանի ու Թուրքիայի հանդեպ իր առաձնահատուկ ջերմությամբ եւ Արցախի անկախության նկատմամբ խիստ բացասական վերաբերմունքով: Եվ քանի որ Ղազախստանը առանցքային դեր է ստանձնում Մաքսային ու ԵվրԱսիական միություններում, որտեղ մեզ արագացված կարգով քաշում է հանրապետական կուսակցության նախագահ Ս.Սարգսյանը, կարելի է ենթադրել, որ ընդհանուր տարադրամն «ալթին» արդեն վերանվանող ապագա «միությունը» նույն հեշտությամբ ու հաջողությամբ արգելելու է հայերին նշել ապրիլի 24-ի, ինչպես նաեւ մայիսի 28-ը, որպես ՄՄ-ԵԱՄ քաղաքական ու քաղաքակրթական սկզբունքներին ու ռուս-թյուրքական համերաշխությանը հակասող միջոցառումներ: Լավագույն դեպքում եւ մեծահոգաբար աչք են փակելու Ցեղասպանության 100-ամյակի համեստ քեֆ-քելեխի արարողության վրա «Փարվանա» կամ «Հարսնաքար » ռեստորաններում:
Չզարմանանք, եթե հոբելյանի կապակցությամբ պատգամավոր Սամվել Լիմինդռի Ալեքսանյանին տրամադրեն Ծիծեռնակաբերդի հուշահամալիրը հերթական սուպերմարկետի համար: Իսկ Արտյուշա Կարապետյանի անունը արժե հիշել: Նման հուդաների կարիքն ու արժեքը բարձր է լինելու Եվրասիական Միության Իրեւանյան գուբերնիայի տարածքային ինքնակառավարման մարմնի որոշ մասերում` վարչապետի կամ նախագահի մականունով:
