Շարունակվում է Հանրային հեռուստառադիոընկերության 2013 թվականի գործունեության վերաբերյալ հաղորդման քննարկումը։
ՀԱԿ պատգամավոր Արամ Մանուկյանը մինչ կհնչեցներ հարցը՝ Հանրային հեռուստաընկերության և ռադիոյի նախագահ Ռուբեն Ջաղինյանին խնդրեց նշումներ կատարել, քանի որ հարցերը շատ են: Պատգամավորի հարցը վերաբերում էր վարկերին. քանիսն են և գումարը որքա՞ն է կազմում:
«Ինչո՞ւ վարկերը եկամուտների աղյուսակում նշված չեն: Հարցերը մի քիչ շատ են, պետք է նշումներ անեք: Գրիչ չունե՞ք, գրիչ տվեք: Վարկերը փակվել են Կառավարության պահուստային ֆոնդից՝ 856 միլիոն դրամով: Դուք նախապես գիտեի՞ք, որ չեք կարողանալու փակել, կամ հետո՞ պետք է դիմեիք Կառավարությանը՝ վարկը փակելու համար: Պետությունը փակել է միայն վարկի տոկոսը, թե՞ վարկը: Եվ, ինչու՞ եք վարկի դիմում, եթե ձեր ծախսերը՝ մուտքն ու ելքը հավասար են: Ինչո՞ւ վարկ վերցնել, որ Կառավարությունն էլ պահուստային ֆոնդից վճարի: Պահուստային ֆոնդը հրատապ, արտառոց դեպքերի համար է»:
Ռուբեն Ջաղինյանը նկատեց, որ ճիշտ կլինի՝ պատասխանները գրավոր ուղարկեն, թվերի մեջ հնարավոր է՝ վրիպում լինի: Ինչ վերաբերում է պահուստային ֆոնդին, պետք է հասկանալ, որ Հ1-ի տարածքում կան շինություններ, որոնք քանդվում էին: Իսկ վարկը մեկն է:
