Սյունիքի մարզպետ Սուրիկ Խաչատրյանի տան մոտ զինված միջադեպի հետևանքով սպանված Ավետիք Բուդաղյանի հոր՝ Էմիլ Բուդաղյանի գանգատը նրա ներկայացուցիչ Հայկ Ալումյանը մարտի 18-ին անձամբ է մուտք արել Մարդու իրավունքների եվրոպական դատարան:
Այս մասին այսօր «Փաստինֆո»-ի թղթակցին հայտնել է Հայկ Ալումյանը, հավելելով՝ «անհամբեր կսպասենք այնտեղ զարգացումներին»:
Հարցին, թե որքա՞ն կտևի մինչև գանգատին «հերթը հասնի», Հայկ Ալումյանը կարծիք հայտնեց, որ Եվրոդատարանի ընթացակարգերը բավականին արագանում են, և դա ընդհանուր տենդենց է: ՄԻԵԴ-ը լավագույնս բեռնաթափելու ու դատարանի աշխատանքը արագացնելու նպատակով ընդունված թիվ 14 արձանագրության արդյունքներն արդեն երևում են, գտնում է Հայկ Ալումյանը, ուստի՝ Եվրոդատարանում այլևս շատ երկարատև քննվող գործեր չեն լինի:
Հայկ Ալումյանը նշել է նաև, որ վերջին երեք տարիներին Հայաստանի գործերը պարզապես չէին քննվում, համարյա վճիռ չկա Հայաստանի գործերով: «Զանազան տեխնիկական հնարքների արդյունքում կարողացել էին այնպես անել, որ Հայաստանի հետ կապված գործերը չէին քննվում, բայց հիմա դրա վերջն էլ է եկել, այդ տեխնիկական հնարքներն այնտեղ բոլորի համար պարզ են դարձել, և ես կարծում եմ, որ Հայաստանի վերաբերյալ գործերը կսկսեն քննվել, նույնիսկ ավելի արագ, քան սովորական պայմաններում կքննվեին:
Արդեն Հայաստանի գործերը խոշորացույցի տակ են հայտնվել այնտեղ», - ասել է Հ.Ալումյանը՝ հույս հայտնելով, որ նաև Բուդաղյանների գործով մոտ ժամանակներս Ստրասբուրգից ինչ-որ նորություններ կլինեն:
