Գաֆէսճեան արվեստի կենտրոնում բացվեց «Հայկական թաղամաս» ցուցադրությունը, որը ներկայացնում է անկախության շրջանի հայ կերպարվեստի առանցքային ներկայացուցիչներից մեկի՝ Սարգիս Համալբաշյանի ստեղծագործությունները, որոնք նվիրված են Հայոց ցեղասպանության 100-րդ տարելիցին:
«Նկարներն արվել են վերջին շրջանում: Հայկական թաղամասը բնորոշ է աշխարհի բոլոր համայնքներին, հատկապես Արևմտյան Հայաստանի, և իմ մեծ կտավներից մեկի մոտիվը դա է: «Հայկական թաղամաս» արտահայտությունը շատ է կիրառվել. այն միշտ շրջապատել են, պաշտպանվել է, միասին ապրել են և այլն…»:
Մեկ ուրիշ աշխատանք էլ կա՝ կոչվում է «Կիրակի», որն էլ կապված է Գյումրիում ապրող մարդկանց թաղամասի հետ, որն իմ մանկության հուշերից է: Թաղամաս հասկացությունը Գյումրիին շատ է բնորոշ, մարդիկ մեկ ընտանիքի նման են ապրում, բոլորը գիտեն՝ ով ուր գնաց, որտեղից եկավ, երբ եկավ: Միասին ճաշում են, միասին ուրախանում են, միասին կռվում:
Այս ամենը տեղ է գտել կտավում, քանի որ յուրաքանչյուր արվեստագետ իր մտածողությունը զարգացնում է իր մասնագիտությանը համարժեք. երաժիշտների մոտ երևույթները վերածվում են հնչյունների, բանաստեղծների մոտ՝ բառերի, նկարիչների մոտ էլ՝ պատկերների»,-Asekose.am-ի թղթակցի հետ զրույցում ասաց Սարգիս Համալբաշյանը:
Հարցին, թե արդյոք այսօր պահպանվա՞ծ է Գյումրիի կոլորիտը, որը ներկայացված է կտավում, Սարգիս Համալբաշյանը նկատեց.
«Գյումրիի կոլորիտն իր արյան մեջ է: Քանի այս քաղաքը կա, ամենը տարբեր ձևափոխումներով պահպանվում է.պարտադիր չէ՝ գլխարկ դնեն, կամ կոստյում հագնեն»:
Նկարիչը 26 տարի է՝ ապրում է Երևանում, բայց դեռ այստեղի որևէ թաղամաս չի նկարել.
«Միայն ավտոբուսի կանգառն է դեռևս…»,-ասաց Սարգիս Համալբաշյանը:
Նշենք, որ ցուցադրությունը կգործի մինչև հունիսի 19-ը: Մուտքն ազատ կլինի ապրիլի 17-19-ը:
Անի Կարապետյան