Վերաքննիչ դատարանն այսօր անփոփոխ թողեց Կոտայքի ընդհանուր իրավասության դատարանի որոշումը Վարդան Պետրոսյանի գործով:
Վարդան Պետրոսյանը հունվարի 29-ին դատավոր Վաղինակ Մկրտչյանի վճռով դատապարտվել էր 5 տարվա ազատազրկման, ինչպես նաև 2 տարով զրկվել էր տրանսպորտային միջոց վարելու իրավունքից։
Տուժողների ներկայացուցիչ Ռուբեն Բալոյանը Վերաքննիչ դատարանից պահանջել էր Վարդան Պետրոսյանի դատավճիռը 5-ից դարձնել 6, իսկ վարորդական իրավունքից զրկել ոչ թե 2, այլ 3 տարով։
Տուժող Արթուր Հակոբյանը և Նաիրա Հայրապետյանը վրդովմունքով արձագանքեցին դատարանի որոշմանը. «Բոլորը ծախված են, մենք գիտենք, որ Վարդանը հարբած է եղել, նույնիսկ իր հարազատներն են դա ասել: Երկու ջահել երեխեքի գլուխն ա կերել ու մենք չենք պատրաստվում հաշտվել»,- ասաց Արթուր Հակոբյանը:
Որոշման հրապարակման ժամանակ մեղադրողը և տուժողի ներկայացուցիչ Ռուբեն Բալոյանը ներկա չէին: