Արդեն տեղեկացրել ենք, որ Euronews-ի տեսանյութից պարզ է դառնում, թե ինչպես է Ռումինիայում ոստիկանությունն առգրավում 333 կգ հերոին: Թմրանյութերը Աֆղանստանից Ադրբեջանով, Վրաստանով, Հայաստանով և Ուկրաինայով Ռումինիա էին հասել բեռնատարների միջոցով:
Հայաստանի` այս պատմությանն առնչություն ունենալու վերաբերյալ Asekose.am-ի թղթակիցը զրուցել է Հետաքննող լրագրողների «Հետք» առցանց լրատվամիջոցի գլխավոր խմբագիր Էդիկ Բաղդասարյանի հետ: Վերջինիս կարծիքով սա նմանատիպ հերթական դեպքերից մեկն է.
«Արդեն ապացուցված է և բազմաթիվ փաստեր կան, որ Հայաստանից թմրանյութեր են գնում: Վաղուց ֆիքսված է, որ Հայաստանը թմրանյութերի առումով տարանցիկ երկիր է: Ես չեմ զարմանում... Եթե մի տոննա թմրանյութ փորձում են անցկացնել, ապա 200 կգ կամ 10 կգ ինչո՞ւ չպետք է փորձեն»:
Նշենք, որ Էդիկ Բաղդասարյանի մատնանշածը 2014 թվականի հունվարի 17-ին է տեղի ունեցել, երբ Մեղրիի մաքսակետում հայտնաբերվել էր 928 կիլոգրամ «հերոին» տեսակի թմրամիջոց: Մոտ 1 տոննա հերոինը փորձ է արվել փոխադրել բեռնատարի միջոցով: ՀՀ վերաքննիչ դատարանի` 20.05.2015թ. որոշումն ուժի մեջ մտնելուց հետո «հերոին» տեսակի թմրամիջոցը ոչնչացման ենթակա է եղել: Այն այրման միջոցով ոչնչացվել է հունիսի 6-ին` Արարատի ցեմենտի գործարանի վառարանում:
Շարունակելով թեման` մեր այն դիտարկմանը արդյո՞ք այս անգամ ի տարբերություն նախորդի` հաջողվել է անցնել Հայաստանով միայն քանակի համեմատական սակավության պատճառով, Էդիկ Բաղդասարյանն ասաց.
«Աշխարհում շատ քիչ է լինում, որ նման մեծ քանակով թմրանյութեր հայտնաբերվեն: Որքան հիշում եմ, տարածաշրջանում առաջին դեպքն էր, դրա համար ուշադրության էր արժանացել, թեպետ դա էլ այդքան մեծ չէր: Դրանից հետո ևս մի քանի դեպքեր եղան, որոնց ժամանակ մեր մաքսատունն անցել էին, սակայն Վրաստանում հայտնաբերել էին թմրամիջոցները: Այս ամենն այնքան մեծ թիվ է կազմում, որ երբեմն հայտնաբերում են, երբեմն` ոչ, սակայն եթե նրանց հասնում են օպերատիվ տվյալները, գործողություններ են իրականացնում և հայտնաբերում են»:
Էդիկ Բաղդասարյանից նաև հետաքրքրվեցինք, թե ինչի արդյունք է թմրամիջոցի չհայտնաբերումը` վատ աշխատանքի՞:
«Ես ավելի շատ կասեի, որ այդ ամենը թմրաբիզնեսներով զբաղվողների լավ կազմակերպված աշխատանքի արդյունքն է: Նրանք գիտեն, թե որոնք են թույլ երկրները, թույլ կետերը. և վայրերը գիտեն և այդտեղով էլ անցկացնում են թմրամիջոցները»:
Զրույցի վերջում էլ հետաքննող լրագրող Էդիկ Բաղդասարյանն անդրադարձավ այն շրջանառվող վարկածին, որի համաձայն` թմրամիջոցները կարողանում են անցկացնել Հայաստանով, որովհետև համապատասխան օղակներն այդ ամենն «անտեսում» են:
«Իհարկե, դա էլ չի բացառվում, որ նրանք այս տարածքում օգնողներ ունեն. առանց այստեղ ունեցած մարդկանց` այդ ամենը չէին կարող տեղափոխել»,-իր խոսքը եզրափակեց Էդիկ Բաղդասարյանը:
Հավելենք նաև, որ ըստ նախնական տեղեկության` Ռումինիայում հայտնաբերված 333 կգ հերոինի շուկայական արժեքը 8 միլիոն եվրո է կազմում, վաճառքի արդյունքում էլ շահույթը կկազմեր 40 միլիոն եվրո: Թմրանյութերի տեղափոխման պատասխանատուներն ազգությամբ թուրքեր և ռումինացիներ էին: Այս գործով ներգրավված են 11 անձ, որոնցից 4-ն արդեն ձերբակալվել են:
Հեղինակ` Լիլիթ Հակոբյան
