Ամեն տարի աշխարհի մի շարք երկրներում հոկտեմբերի երկրորդ հինգշաբթին նվիրվում է տեսողությանը: Օրվա խորհուրդն է՝ բարձրաձայնել տեսողության խանգարումներով և կուրությամբ տառապող անձանց հիմնախնդիրները` հանրության ուշադրությունը սևեռելով կուրության, տեսողության խանգարման և թույլ տեսողության վերականգնման հարցերին:
«Երեխաների համար կարևոր է աշխատանքի և հանգստի ճիշտ ռեժիմը, 40 տարեկանից հետո անպայման պետք է չափել աչքի ճնշումև և չպետք է խառնել դա արյան զարկերակային ճնշման հետ: Հատկապես շաքարային դիաբետով տառապող անձինք պետք է ստուգեն ակնահատակը»,-այսօր՝ լրագրողների հետ հանդիպման ժամանակ ասաց ՀՀ գլխավոր ակնաբույժ Ալեքսանդր Մալայանը:
Ինչ վերաբերում է ակնոց կրելուն՝ Ալեքսանդր Մալայանը նկատում է՝
«Եթե տեսողական խնդիր ունեք ու ակնոց չեք կրում, հավանական է, որ հետո ակնոցն էլ չփրկի.մարդու աչքն ու ուղեղը սովորում է այն տեսողությանը, որը նա ունի»:
Հայկական ակնաբուժության նախագծի հայաստանյան գրասենյակի տնօրեն Նունե Եղիազարյանն էլ տեղեկացրեց, որ այսօր՝ 20:00-20:15-ին 15 րոպեով կանջատվեն Մատենադարանի լույսերը.
«Այդպիսով միանում ենք մի շարք երկրների նախաձեռնությանը: Ընտրվել է Մատենադարանի կառույցը, քանի որ խորհրդանշում է հայկական մշակութային ժառանգությունը, որը տեսնել հնարավոր չէր լինի, եթե մարդիկ կույր լինեին կամ տեսողության խնդիրներ ունենային»,-ասաց Նունե Եղիազարյանը:
Անի Կարապետյան