Այսօր Գյումրի քաղաքի Վարդանանց հրապարակում Հռոմի Պապի կողմից Սուրբ պատարագ մատուցելուց առաջ ոստիկանները նկատել են Շահեն Հարությունյանին՝ վերնաշապիկի մեջ իր թաքցնելիս:
Հաշվի առնելով վերջինիս կողմից նախկինում դրսևորված խուլիգանական վարքագիծը և ոստիկանության ծառայողների նկատմամբ անհնազանդության բազմաթիվ դեպքերը, ոստիկանները նրանից պահանջել են գտնվել պատարագի վայրից ողջամիտ հեռավորության վրա:
Շ. Հարությունյանը հրաժարվել է կատարել ոստիկանության ծառայողների օրինական պահանջը: Վարչական իրավախախտումների վերաբերյալ օրենսգրքի 182-րդ հոդվածի հատկանիշներով՝ վերջինիս նկատմամբ հարուցվել է վարչական վարույթ:
Վարչական վարույթին ապահովվել է օրինական ներկայացուցչի և փաստաբանի մասնակցությունը: Նկատի ունենալով, որ Շահեն Հարությունյանը որպես պայմանական դատապարտված անչափահաս գտնվում է պատժի կատարման ստորաբաժանման վերահսկողության տակ, վարչական վարույթն իրականացնում է ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչությունը:
Հիշեցնենք, որ այսօր Դավիթ Սանասարյանը ֆեյսբուքյան իր էջում գրել էր, որ ոստիկանները Գյուրիում առևանգել են Շահեն Հարությունյանին:
Ըստ նրա` Շահենը պատրաստվում էր Պապ Ֆրանցիսկոսին ներկայացնել, որ առաջին քրիստոնյա երկրում` Հայաստանում կան շուրջ 2 տասնյակ քաղբանտարկյալներ:
Ավելի ուշ Asekose.am-ին Շահեն Հարությունյանը ասել է. «Գնացել էի Գյումրի, կրկին ուզում էի պաստառ պարզել, սակայն դեռ անցակետի մոտ արդեն ինձ բերման ենթարկեցին: Նշեմ, որ քաղբանտարկյալներին վերաբերող պաստառը, սակայն, չէր երևում, այսինքն` բերման ենթարկելու պահին նրանք չէին կարող տեսնել ոչ պաստառը, ոչ էլ շապիկիս նկարը, որին հայրս է պատկերված: Պատճառն այն, որ այդ շապիկի վրայից ես մեկ այլ շապիկ էի կրում»: