«Պաշտպանական կողմը կարծում է, որ Ժիրայր Սէֆիլյանի դեմ հարուցված քրեական գործը քաղաքական պատվեր էր՝ պայմանավորված նրա հայացքներով, քաղաքական գործունեությամբ, ապրիլյան պատերազմի ժամանակ ունեցած տարածքային կորուստների իրական չափերի վերաբերյալ հայտարարություններով»,-այսօր՝ լրագրողների հետ հանդիպման ժամանակ ասաց Սէֆիլյանի փաստաբան Արա Զաքարյանը:
Նրա խոսքով՝ տվյալ քրեական գործի հարուցման իրական նպատակը ամեն գնով և երկար ժամանակով Սէֆիլյանին ազատությունից զրկելն է:
Արա Զաքարյանի փոխանցմամբ՝ քննության ընթացքում թույլ են տրվել բազմաթիվ խախտումներ.
«Խախտումներից մեկն այն է, որ Սէֆիլյանը որպես իր փաստաբան մատնանշել է նաև Վարուժան Ավետիսյանին, սակայն քննչական մարմինն ամեն կերպ փորձում է խոչընդոտել դրա իրականացմանը: Նշում են, որ չի կարող պաշտպան լինել, քանի որ կարիք կա նրան հարցաքննել որպես վկա: Սա միակ խախտումը չէ: Առերեսումների ժամանակ էլ պաշտպանական կողմին զրկում են նյութերին ծանոթանալու և հարցեր տալու հնարավորությունից»,-նշեց պաշտպանը՝ հավելելով. «Այն անձը, ում հետ առերեսում տեղի ունեցավ երեկ, պահվածքից կարելի է ենթադրել, որ նրա նկատմամբ կիրառվել են ճնշումներ, չեմ բացառում նաև ֆիզիկական։ Քննչական մարմինը գործով անցնող գուցե մյուս անձանց վրա էլ է ճնշում գործադրել, չեմ բացառում, որ նրանց առջև դրել են քրեական օրենսգիրքը, ցույց տվել 300-րդ հոդվածը ու սպառնացել, որ եթե ցուցմունք չտան, թե նախապատրաստական քայլեր է իրականացվել Սէֆիլյանի կողմից՝ իշխանությունը յուրացնելու ուղղությամբ, ապա ձեզ մեղադրանքներ կառաջադրվեն»:
Արա Զաքարյանը նշեց, որ ցուցմունք տվող անձը մինչեւ առերեսումը նորմալ խոսել է իր հետ, իսկ առերեսման ժամանակ միանգամից փոխվել է. «Առերեսման ընթացքում կցկտուր մտքեր էր արտահայտում, Ժիրայր Սէֆիլյան անուն-ազգանունը առհասարակ չէր կարողանում ասեր, հայացքը դեպի ներքեւ էր ուղղված, իսկ քննիչը ստիպված էր բազմաթիվ հարցերի օգնությամբ բառերը քաշել նրա բերանից»:
Հիշեցնենք, որ 2016 թվականի հունիսի 20-ին ձերբակալվել է Ժիրայր Սէֆիլյանը, որից հետո նրա տանը եւ «Սարդարապատ» շարժման գրասենյակում կատարվել է խուզարկություն: ՀՀ քննչական կոմիտեի տարածած հաղորդագրության համաձայն՝ Ժիրայր Սէֆիլյանը մի խումբ անձանց հետ ծրագրել էր զինված խմբավորումների միջոցով, զենքի գործադրմամբ, զավթել շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:
Անի Կարապետյան