«Ոստիկանության աշխատակիցները, հատկապես բարձրաստիճան սպայական կազմի ներկայացուցիչները, իրավաչափության և գիտելիքների պակաս ունեն: Երբ ինձ բերման ենթարկող ոստիկաններին հարցնում եմ, թե խաղաղության կոչի համար մարդուն բերմա՞ն են ենթարկում, պատասխանում են, թե ցույցերն արգելված են, այդ մասին հայտարարություն կա: Վերջ ի վերջո ի՞նչ է նշանակում տարեց մարդկանց թևը ոլորելը: Դա կարգապահական կոպիտ խախտում է: Ոչ ոք իրավունք չունի ենթարկվել բռնության՝ խաղաղ երթերի, ցույցերի, ակցիաների ժամանակ, եթե վերջինը վտանգ չի ներկայացնում հասարակության համար»,-այսօր՝ լրագրողների հետ հանդիպման ժամանակ ասաց իրավապաշտպան Հայկազ Մակարյանը:
Իրավապաշտպանը նկատում է՝ ցավոք ցուցարարների մեջ սադրիչներ են լինում, չեն ենթարկվում իրավապահների օրինական պահանջին, բռնություն են ցուցաբերում.
«Հզոր ատելության ալիք կա ոստիկանների նկատմամբ: Սրա համար մեղավոր են և՛ քաղաքացիները, և՛ ոստիկանները, և՛ գաղջ մթնոլորտը: Պետք չէ մոռանալ Պավլիկ Մանուկյանի կոչը.եթե ցուցարարները հարվածում են, կեղեքում են ներսից գաղափարը, ուրեմն մեզ են հարվածում, եթե սադրում են, ուրեմն մեզ են սադրում»,- նշեց իրավապաշտպանը:
Հայկազ Մակարյանն անդրադարձավ նաև բերման ենթարկված քաղաքացիներին՝ հուշելով, որ եթե կատարվել է վարչական իրավախախտում, քրեածին տարրեր չեն եղել, պետք է դիմեն դատարան ու Ոստիկանությունից վնասի փոխհատուցում պահանջեն:
Անի Կարապետյան
