Երեկ՝ հուլիսի 29-ի երեկոյան և լույս 30-ին իրենց բողոքն արտահայտող խաղաղ և անզեն ցուցարարները ոստիկանության ուժերի կողմից ենթարկվել են աննախադեպ բռնությունների և հետապնդումների: Ոստիկանները բողոքավոր քաղաքացիների նկատմամբ կիրառել են զենք և հատուկ միջոցներ, դաժան ծեծի ենթարկել բազմաթիվ մարդկանց: Մեծ թվով ցուցարարներ ստացել են տարբեր աստիճանի մարմնական վնասվածքներ, քաղաքի տարբեր մասերում ապօրինի կերպով բերման են ենթարկվել տասնյակ քաղաքացիներ, այդ թվում մարդիկ, ովքեր առնչություն չեն ունեցել բողոքի գործողության հետ: Ոստիկանության ապօրինի գործողությունների զոհ են դարձել նաև իրենց մասնագիտական գործառույթներն իրականացնող բազմաթիվ լրագրողներ: Ոստիկանները չեն խորշել անգամ երեխաների նկատմամբ բռնություն գործադրելուց:
Իրավապահների այս դժնի և քաղաքակիրթ պետությանն անհարիր գործողությունները փոթորկել են ողջ հասարակությանը և խորացրել անվստահությունն իրավապահների և ընդհանրապես բոլոր պետական ինստիտուտների նկատմամբ: Նման զարգացումների շարունակման դեպքում ներքաղաքական ճգնաժամը երկրում էլ ավելի կխորանա՝ երկիրը կանգնեցնելով քաղաքացիական պատերազմի նախաշեմին:
Իշխանությունը, լինելով ներք ներքին համերաշխության և կայունության ապահովման գլխավոր պատասխանատուն, պետք է գիտակցի, որ երկրում ստեղծված լարված մթնոլորտի հիմնական պատճառը ոչ միայն և ոչ այնքան ՊՊԾ գունդը գրաված զինված խումբն է, այլ տարիներով կուտակված և լուծում չստացած լրջագույն համակարգային քաղաքական, սոցիալ-տնտեսական և իրավական խնդիրները: Որքան էլ, որ զինյալների գործողություններն անիրավաչափ են, դրանք հասարակության ոգու ճիչն են՝ ուղղված իշխանություններին, որ այսպես շարունակել այլևս հնարավոր չէ: Հետևաբար իշխանությունը պետք է կանխի կոնֆրոնտացիայի հետագա խորացումը և վերսկսի երկխոսությունը ինչպես զինված խմբի, այնպես էլ ողջ հասարակության հետ՝ սկիզբ դնելով արմատական համակարգային փոփոխությունների: Այդ փոփոխությունների նախանշան կարող են հանդիսանալ երեկվա ոստականական ապօրինությունների հեղինակների և հրաման տվողների հայտնաբերումը և խստագույն պատասխանատվության ենթարկելը: Ներքաղաղաքական այս թնջուկի հանգուցալուծումը կարող է տեղի ունել միմիայն խաղաղ, քաղաքական ճանապարհով, և բռնությունն այստեղ տեղ չունի:
Վերակազմյալ Սոցիալ-Դեմոկրատ Հնչակյան կուսակցությունը խստորեն դատապարտում է երկրում տիրող ոստիկանական բեսպրեդելը և կոչ է անում իշխանություններին անհապաղ ձեռնարկել իրավիճակի լիցքաթափմանն ուղղված քայլեր՝ազատ արձակել երեկվա դեպքերի առնչությամբ անօրինական և անհիմն բերման ենթարկված քաղաքացիներին, անցկացնել ոստիկանության գործողությունների անկախ և արժանահավատ քննություն ու պատժել բոլոր մեղավորներին, վերսկսել երկխսությունը «Սասնա ծռեր» զինված խմբի հետ՝ ստեղծված փակուղային վիճակի ողջամիտ լուծում գտնելու համար:
Վերակազմյալ Սոցիալ Դեմոկրատ Հնչակյան կուսակցություն
