Armtimes.com-ը գրում է.
ԵԱՀԿ ՄԽ ամերիկյան համանախագահ Ջեյմս Ուորլիքն օրեր առաջ հայտարարել էր, որ համանախագահները ջանքեր են կիրառում առաջիկայում Սարգսյան-Ալիեւ հանդիպում կազմակերպելու համար, եւ նախագահները տվել են իրենց համաձայնությունը, սակայն հանդիպման հետ կապված որեւէ տեղեկություն դեռեւս չկա:
Կայքի հետ զրույցում ԼՂՀ նախագահի մամուլի խոսնակ Դավիթ Բաբայանը նկատեց, որ հանդիպման մասին դեռ որեւէ տեղեկության չի տիրապետում:
- Պարոն Բաբայան, Սարգսյան-Ալիեւ հանդիպման մասին, որն առաջիկայում պետք է կայանար, տեղեկություններ ունե՞ք:
- Այս պահի դրությամբ որեւէ նոր բան չեմ կարող ասել:
- Ինչի՞ հետ եք կապում վերջին օրերի լարվածությունը սահմանին, հատկապես, խոշոր տրամաչափի գնդացրից հակառակորդի կողմից հրակոծումները հայ դիրքապահների ուղղությամբ:
- Մենք գործ ունենք Ադրբեջանի պես պետության հետ, որը պարբարաբար, խախտում է զինադադարի ռեժիմը, բայց իհարկե, ամեն ինչ համեմատության մեջ պետք է դիտարկել, իսկ եթե համեմատենք, լարվածությունն այս օրերին ավելի քիչ է եղել, քան ապրիլյան պատերազմի նախօրեին, բայց էական տեղաշարժ Ադրբեջանի վարքագծում տեղի չի ունեցել:
-Պարոն Բաբայան, սովորաբար հանդիպումներից առաջ են նման զինատեսակներ կիրառում, հնարավո՞ր է հակառակորդը գիտի այդ հանդիպման մասին, դրա համար է այն կիրառում:
- Սովորաբար, կարեւոր հանդիպումների նախօրեին, հանդիպումների ժամանակ ու հանդիպումներից հետո լինում են նման ահաբեկչական գործողություններ, բայց ընդհանուր առմամբ, դա արտացոլում է Ադրբեջանի էությունը:
Առավել մանրամասն՝ սկզբնաղբյուր կայքում