Հոկտեմբերի 22-ին Ալեքսանդր Սպենդիարյանի անվան օպերայի և բալետի ազգային ակադեմիական թատրոնում տեղի ունեցավ իտալացի մեծանուն կոմպոզիտոր Ջակոմո Պուչինիի հանրահայտ «Տոսկա» օպերայի հայաստանյան պրեմիերան, որը նվիրվում է աշխարհահռչակ օպերային երգիչ Գեղամ Գրիգորյանի հիշատակին:
Ներկայացման բեմադրող ռեժիսորն է Նաիրե Ստեփանյանը,բեմադրող դիրիժորը՝ Ջանլուկա Մարչիանոն/Իտալիա/, բեմադրող նկարիչը՝ Ավետիս Բարսեղյանը/ՀՀ վաստ. նկարիչ/: Բեմադրման աշխատանքներին մասնակցում է նաև հրավիրյալ թատերական լուսային ռեժիսոր Ալեքսանդր Սիվաևը/Ռուսաստան/:
«Այս նախագիծը Գեղամ Գրիգորյանի մտահղացումն էր: Երբ եկավ թատրոն՝ առաջնահերթ նպատակներից էր բեմադրել «Տոսկա» օպերան: Ցավալի է, որ այժմ նա չկա, բայց մենք աշխատակիցներով պարտք ենք համարում իրականացնել այդ երազանքը»,-ասաց Ալեքսանդր Սպենդիարյանի անվան օպերայի և բալետի ազգային ակադեմիական թատրոնի տնօրեն Անդրանիկ Արզումանյանը:
Ներկայացման բեմադրող ռեժիսոր Նաիրե Ստեփանյանն էլ հավելեց, որ օպերան բեմադրված է արդիական, դինամիկ ու գունեղ:
Նաիրեի խոսքը գործ էր դարձել: Մոտ 3 ժամ հանդիսատեսը լարված հետևեց, չքնեց ու չլքեց դահլիճը:
«Սա բոլորիս հաջողությունն է»,-հիացմունքով ասում էր հանդիսատեսը:
Այսօր՝ հոկտեմբերի 24-ին, բեմադրության հերթական ներկայացումն է, բայց այլ դերակատարներով:
Նշենք, որ Ջ. Պուչինիի «Տոսկա» օպերան հանդիսանում է աշխարհի հեղինակավոր թատրոններում ամենահաճախ բեմադրվող օպերաներից մեկը: Իտալերեն լիբրետոն՝ Լ. Իլլիկայի և Ջ. Ջակոզայի, ըստ՝ Վ. Սարդուի մելոդրամայի: Օպերայի առաջնախաղը կայացել է 1900 թ. հունվարի 14-ին Հռոմում: «Տոսկա» օպերան ավելի քան մեկ դար է ներկայացվում է աշխարհի հեղինակավոր թատրոններում՝ մշտապես մնալով ամենից սիրված օպերային ստեղծագործություններից մեկը: Առաջնախաղից քսան տարի անց «Տոսկան» արդեն ցուցադրվել էր 3000 անգամ: «Տոսկան» մեծ խանդավառությամբ ընդունվեց հատկապես Իտալիայում և ինչպես Պուչինին էր ակնկալում՝ հանդիսատեսը մեծապես սիրեց իր նոր ստեղծագործությունը: «Տոսկա» օպերան Վ. Սարդուն անվանեց հռոմեական դրամա՝ խնդիր դնելով կոմպոզիտորի առջև լավագույն կերպով ներկայացնել այն ամենն, ինչ կարտացոլեր հռոմեականը:
Անի Կարապետյան
Լուսանկարը՝ Տիգրան Առաքելյանի
Օպերայից բացառիկ հատված՝ ստորև
Գլխավոր դերերում
Տոսկա՝ Սիրանուշ Գասպարյան, Լիլիթ Սողոմոնյան,Աննա Այվազյան:
Կավարադոսի՝ Հովհաննես Այվազյան, Սարգիս Աղամալյան /ՀՀ վաստ. արտիստ/:
Սկարպիա՝ Գևորգ Հակոբյան /ՀՀ վաստ. արտիստ/, Դավիթ Բաբայանց, Գեորգի Առաքելով:
Սագրեստանո՝ Հայկ Տիգրանյան, Կիմ Սարգսյան:
Թատրոնի գեղարվեստական ղեկավարն է ՌԴ վաստ. արտիստ Կոնստանտին Օրբելյանը:
