Արդեն տեղեկացրել ենք, որ Ռիոյի օլիմպիական խաղերի կրկնակի չեմպիոն, աշխարհի չեմպիոն, Եվրոպայի քառակի չեմպիոն Ռուսաստանի դրոշի ներքո հանդես եկող սուսերամարտուհի Յանա Եգորյանը ռուսական «Экспресс-газета»-ին տված հարցազրույցում նշել էր, որ իրեն չեն հետաքրքրում Հայաստանի եւ Ադրբեջանի միջեւ եղած խնդիրները, եւ նա ադրբեջանցի շատ ընկերներ ունի: Այս խոսքերի պատճառով Յանա Եգորյանը խիստ քննադատության արժանացավ հայ հասարակության մի մասի կողմից:
Rusarminfo.ru-ին տված հարցազրույցում Յանան, սակայն, հերքել է, որ նման բան է ասել: «Ես չեմ ասել, որ թքած ունեմ, որ Հայաստանն ու Ադրբեջանը բարձր մակարդակներում խնդիրներ ունեն»,-ասել է սուսերամարտիկը
Հիշեցնենք նաև, որ Յանա Եգորյանի հայրը՝ Կարապետ Ալավերդյանը, ով Յանային 17 տարի չի տեսել, հետևյալ կերպ էր արձագանքել դստեր հայտարարությանը. « Վերցրեք Յանայի հին հարցազրույցները, կտեսնեք, որ սրանք անիմաստ, հիմար խոսակցություններ են։ Հարցազրույցներում նա բազմիցս նշել է, թե ինչպես է վերաբերվում Հայաստանին, հայ էությանը, հայ ժողովրդին, իր ազգությանը։Բացառվում է՝ Յանան նկատի ունենա, որ թքած ունի Հայաստանի վրա։ Հասկանում եք, նա քաղաքականության հետ կապ չունի։ Հայաստանի և Ադրբեջանի միջև հարաբերություններն ընդհանրապես չեն վերաբերում նրա շրջապատին և ընկերությանը»։