Հայ ռուսահպատակ մեծախոսնե՛ր, լռե՛ք, հա՞, լռե՛ք: Մոսկվայում մեկ տարում երկու հայկական դպրոց է փակվել
Այս տարեսկզբին փակվել է Մոսկվայում 1989թվականին, երկրաշարժից ունեզրկված ու Մոսկվա տեղափոխված հայ երեխաների համար հիմնադրված գործող ու կայացած թ.1650 հայկական դպրոցը: Այն օպտիմալացման անվան տակ միավորել են մի այլ դպրոցի՝ պատճառաբանելով, որ այդ դպրոցում սովորում են 150 հայ երեխաներ ու դպրոցը աշակերտ թվով է ֆինանսավորվում, շենքը մեծ է ծախսը՝ շատ:
Շատ տարօրինակ է, որ թ.1650 հայկական դպրոցը գտնվել է Մոսկվայի կենտրոնում ու Կրեմլի անմիջական հարևանությամբ, հինգ հարկանի շենքում և մոսկվայաբնակ հայ մեծահարուստներն այդ շենքին տիրություն չեն արել: Կարող էին չէ՞, հայկական դպրոցի համար գնել այդ շենքն ու այնտեղ նաև հայկական մշակույթի օրինակելի օջախ հիմնադրեին: Դրա փոխարեն Արա Աբրահամյանը, Անդրանիկ Նիկողոսյանը խոստացել են դիմել ՌԴ նախագահ Պուտինին, մեծ-մեծ խոստումներ տվել հայ համայնքին: Մասնավորապես տեսեք, թե ի՞նչ է ասել Անդրանիկ Նիկողոսյանը. < Նրա խոսքով՝ ինքը Հայաստանում 100-ից ավելի ռուսական ուսուցման կենտրոններ է հիմնադրել և չի կարծում, որ մեկ հայկական դպրոցը փրկելը կարող է խնդիր լինել. «Չեմ կարծում, որ նախագահ Պուտինը կմերժի մեզ: Մենք ամեն ինչ կանենք, որպեսզի հայկական դպրոցը չփակվի»:> Պուտինը, պարզապես , բանի տեղ չի դրել նրանց խնդրանքը:
Հայկական դպրոցները փակելու ռուսական քաղաքականությունը մեր պատմության մեջ նորություն չէ, նրանք շատ լավ գիտեն՝ ՀԱՅԻ ինքնությունը պահպանողը ՀԱՅՈՑ լեզուն է ու Ռուսաստանում հենց այն վերացնելու վրա էլ աշխատում են: Բավական չի Ռուսաստանում փակում են հայկական դպրոցները, Հայաստանում էլ ուզում են ռուսերենին հատուկ կարգավիճակ տալ: Դարերի պատմությունը վկա, Չի՛ ստացվի, Լազարյան ճեմարանն էլ փակեցին, որտեղ լավագույն կրթություն են ստացել ոչ միայն հայ մտավորականներ: Ճեմարանի սաներից են եղել նաև Լև Տոլստոյը, Իվան Տուրգենևը, Կոնստանտին Ստանիսլավսկին, Միխայիլ Գլինկան, Յու. Վեսելովսկին։
Վաղը Հայաստան է գալիս ՌԴ ԿԳ նախարարը, տեսնենք այս մասին ՀՀ նախագահն ու ԿԳ նախարարն ի՞նչ են խոսելու նրա հետ, իսկ հայ ռուսահպատակ մեծախոսներն էլ թող ընդհանրապես լռե՛ն: Լռե՛ք, հա՞, լռե՛ք: