ՀՀ կառավարությանն առընթեր Պետական եկամուտների կոմիտեի «Եկամուտների վարչարարության բարեփոխումների հասարակական խորհրդի» անդամ Վահագն Համբարձումյանն այսօր հանդիպել է լրագրողներին ու ներկայացրել Հարկային օրենսգրքի սահմանած դրույթներն ու այն, թե ինչպիսի՞ ազդեցություն կարող են ունենալ դրանք վարձու աշխատողների աշխատավարձերի վրա:
Նրա փոխանցմամբ՝ եկամտահարկի դրույքաչափի փոփոխությունը հօգուտ աշխատողի է լինելու, նվազում է մինչև 120.000 դրամ աշխատավարձ ստացողների եկամտային հարկի դրույքաչափը՝ 24,4 տոկոսից դառնալով 23 տոկոս:
Իսկ 120.000 դրամից մինչև 2 միլիոն դրամ աշխատավարձի դեպքում 26 տոկոսը կաճի՝ տատանվելով 28-ից 33 տոկոսի միջակայքում:
«Մինչև 2 միլիոն դրամն արել ենք հաշվարկ, որի դեպքում բացասական ազդեցությունը 34 420 դրամ է՝ ի վնաս եկամուտ ստացողի: 600.000 վարձու աշխատողների մոտ 90 %-ը այն տիրույթում է, որի վրա ազդեցությունը դրական է, այսինքն՝ մինչև 279 000 դրամը»,-պարզաբանեց Վահագն Համբարձումյանը:
Ինչ վերաբերում է գնաճին ու ընդդիմադիրների կողմից աշխատավարձը բարձրացնելու խնդրին, բանախոսը նկատեց.
«Պետությունը չի կարող գործատուներին կոչ անել, որպեսզի բարձրացնեն աշխատավարձը, դա պետք է իրավական ակտերով լինի: Միակ գործիքը նվազագույն աշխատավարձի շեմի բարձրացումն է: Ես կողմ եմ դրան, քանի որ շատ ժամանակ մարդ է հանդիպում, երբ հարցնում ենք, թե որքա՞ն է նրա հայտարարագրված աշխատավարձը, պատասխանում է՝ 55.000 դրամ: Այդքան գումարի դեպքում նա մինչև այդ կազմակերպության դուռն էլ չի հասնի, ուր մնաց՝ 8 ժամ աշխատի»:
Անի Կարապետյան
