Սյունիքի նախկին մարզպետ Սուրիկ Խաչատրյանի տան մոտ տեղի ունեցած միջադեպի փաստով հարուցված քրեական գործով ապօրինի որոշում է կայացվել, ասում է փաստաբան Հայկ Ալումյանը։
«Քննչական մարմինը համարել էր, որ Ավետիք Բուդաղյանն է եղել հարձակվողը, սպանության փորձ կատարողը և սրանից էլ բխում էին մյուս հետևությունները: Սուրիկ Խաչատրյանի հարազատներն էլ գործել են անհրաժեշտության սահմաններում: Այս որոշումը Վերաքննիչ դատարանի կողմից ճանաչվեց անօրինական և հետագայում վերացվեց: Մեր ներպետական մարմինները կարծես թե սկսեցին գործել օրենքի սահմաններում: Կրկին հարուցվեց քրեական գործ ու քննություն սկսվեց: Սակայն մեր լավատեսական կանխատեսումները չարդարացան: Փետրվարի 13-ին քննիչի կողմից կայացրած որոշում ստացանք: Նույն գնահատականներն էին տրվել Ավետիք Բուդաղյանին, քննիչը համարել է, որ նա է եղել նախահարձակ ու նրան ճանաչել են սպանության փորձ կատարող: Նաև Սուրիկ Խաչատրյանի մտերիմներից մեկին ծանր մարմնական վնասվածք հասցնելու մեջ էին մեղադրում: Մենք բողոքեցինք՝ նշելով, որ քննիչի որոշմամբ նման գնահատականներ չեն կարող տալ: Եթե Սուրիկ Խաչատրյանին համարում են պաշտպանվող կողմ, ուրեմն հետևություններ ու գնահատական պետք է տա դատարանը, ոչ թե քննիչը»,-լրագրողների հետ հանդիպման ժամանակ ասաց Հայկ Ալումյանը՝ հավելելով.
«Ուզում եմ դիմել ՀՀ Գլխավոր դատախազին: Հարգելի՛ դատախազ, շատ են մանրացվել միջոցները, որոնցով փորձ է արվում կրկին խախտել Ավետիք Բուդաղյանի իրավունքները»:
Փաստաբանի փոխանցմամբ՝ իրենք քննիչի որոշման դեմ բողոքելուց հետո ստացել են դատախազի ստորագրությամբ մի որոշում, որտեղ գրված է, որ Էմիլ Բուդաղյանը, ով իր սպանված որդու համար բողոքներ է ներկայացնում, և նրա փաստաբանն այլևս չունեն դատավարական կարգավիճակ, այսինքն՝ չեն կարող բողոքներ նեկայացնել, դրանք չեն քննվելու:
«Այս գործով ՄԻԵԴ-ում հաջողության հասնելու ավելի մեծ շանսեր մեզ տվեցին: Ցավում եմ, որ արդարադատություն ակնկալում ենք միայն Եվրոպական դատարանից Սուրիկ Խաչատրյանի և նման այլ քրեական գործերի դեպքում: Այս ամբողջ ապօրինությունները վիճարկելու ենք ՀՀ դատական համակարգում, ապա ՄԻԵԴ-ում: Հույս չունենաք, որ ինչ-որ փուլում պայքարը դադարեցնելու ենք: Մեղավորները պետք է հայտնվեն ամբաստանյալի աթոռին»,-նկատեց Հայկ Ալումյանը
Անի Կարապետյան
