Ռուսաստանյան նախագահական ընտրությունների ֆոնին Երեւանի Հակոբ Օշականի անվան թիվ 172 դպրոցի հայ երեխաներին սովորեցնում են, որ Ռուսաստանն իրենց հայրենիքն է: Ռուսական միջոցառման ժամանակ, երեխաները կանգնած են «Ռուսաստանն իմ հայրենիքն է» կարգախոսի տակ: Այս մասին ահազանգում է Երևանի ավագանու «Ելք» խմբակցության անդամ, Կրթության, մշակույթի և սոցիալական հարցերի մշտական հանձնաժողովի նախագահ Արայիկ Հարությունյանը ֆեյսբուքյան իր էջում ու ներկայացնում կից լուսանկարներ.
«Ձեզ կթվա, թե սա ռուսաստանյան միջին վիճակագրական դպրոց է: Բայց այս այլանդակությունը տեղի է ունեցել երևանյան՝ Հակոբ Օշականի անվան թիվ 172 դպրոցում:
Հայաստանի Հանրապետության քաղաքացի աշակերտներին կանգնեցրել են «Ռուսաստանն իմ հայրենիքն է» կարգախոսի տակ: Ավելին, Ռուսաստանի դրոշի գույները պարտավոր չես իմանալ, բայց Հայաստանի գույների հերթականությունը չիմանալու համար դպրոցի ուսուցիչն ու տնօրենը գետինը պետք է մտնեն: Տնօրեն Գայանե Մկրտչյանի ու դասվարի համար, թերևս ՌԴ-ն է իրենց հայրենիքը: Բայց այդ երեխաներին նման կերպ փչացնելը ոչ միայն այլանդակություն է, այլ նաև հանցագործություն: Չեմ զարմանա, որ տնօրենը ձեռքը սրտին դրել է ՌԴ հիմնի ժամանակ: Հաշվի առնելով այս ամենն՝ այսօր դիմել եմ պատկան մարմիններին սույն անձնավորություններին ՀՀ անկախ պետության որևէ դպրոցից տասնյակ կիլոմտրերով հետ պահելու համար»,- ասված է գրառման մեջ:լուսանկարները՝ Արայիկ Հարությունյանի ֆեյսբուքյան էջից