Երևան քաղաքի առաջին ատյանի ընդհանուր իրավասության դատարանի դատավոր Վաչե Մարգարյանը հայտարարություն է տարածել, որում նշում է, որ ԱԱԾ տնօրեն Արթուր Վանեցյանին անձամբ չի ճանաչում և երբևէ չի զանգահարել:
Դատավոր Մարգարյանի հայտարարությունն ամբողջությամբ.
«2018 թվականի սեպտեմբերի 11-ին համացանցում տարածված գաղտնալսման մեջ ինձ է վերագրվում ՀՀ Ազգային անվտանգության ծառայության տնօրենի հետ հեռախոսային խոսակցությունը՝ 26.07.2018թ. իմ կողմից խափանման միջոց ընտրելու հետ կապված միջնորդության քննության առնչությամբ:
Ամենայն պատասխանատվությամբ հայտարարում եմ, որ ես ՀՀ ԱԱԾ տնօրենին անձամբ չեմ ճանաչում, նրան չեմ զանգահարել և նրա հետ երբևիցե որևէ հեռախոսային խոսակցություն չեմ ունեցել»:
Հիշեցնենք, որ ձայնագրության մեջ ԱԱԾ տնօրեն Վանեցյանը նշում էր, որ իրեն զանգահարել է դատավորը, սակայն ձայնագրության մեջ զանգահարող դատավորի անունը Հրաչիկ է նշվում:
