ՀՀ ՊԵԿ օպերատիվ հետախուզության վարչության պետ Կարեն Կարապետյանի գործունեության մասով ծառայողական քննությունն արդեն ավարտվել է. այս մասին «Ժողովուրդ» օրաթերթի հետ զրույցում հայտարարել է ՊԵԿ նախագահ Դավիթ Անանյանը:
«Քննությունն ավարտվել է, եւ նյութերն ուղարկվել են ՀՀ հատուկ քննչական ծառայություն, քրեական գործ է հարուցված եւ այն ընթանում է»,- տեղեկացրել է Անանյանը:
«ժողովուրդ» օրաթերթը պարզել է, որ այժմ օպերատիվ հետախուզության վարչության պետի պաշտոնակատարը Լեւոն Հովհաննիսյանն է:
Այսինքն` վերջինս կատարում է Կարեն Կարապետյանի աշխատանքային պարտականությունները: Ավելին, թերթին հայտնի է դարձել, որ Կարապետյանին մեղադրանք է առաջադրվելու:
Ըստ շրջանառվող լուրերի`Կարապետյանը աշխատել է սեփական ընկերության օգտին` շուկայից դուրս մղելով մյուս ընկերություններին:
Հիշեցնենք, որ Կարեն Կարապետյանը սկանդալների կենտրոնում հայտնված պաշտոնյա է, նախկինում նա հեռացվել էր ՊԵԿ համակարգից, բայց Դավիթ Անանյանի առաջարկով նշանակվել էր վերոնշյալ վարչության պետ:
ՊԵԿ նախագահը «Ժողովուրդ» օրաթերթին փոխանցել է նաեւ, որ այս ընթացքում ՊԵԿ բազմաթիվ աշխատակիցների մասով ծառայողական քննություն է ընթանում: