Մենք չէինք նստել որոշում կայացնելու, մենք եկել էինք ապագա բանակցությունների համար պայմանավորվածություններ ձեռք բերելու, և դրանք ձեռք ենք բերել:
Այսպես ամփոփեց «ՀՀԿ» խմբակցության ղեկավար Վահրամ Բաղդասարյանը իր և ՀՀ վարչապետ Նիկոլ Փաշինյանի հանդիպումը:
Նա դրական համարեց պայմանավորվածությունները, թե ինչ ֆորմատով հանդիպումները կշարունակվեն, նաև այլ խմբակցությունների հետ հանդիպումներ կլինեն: Ըստ նրա՝ պետք է Սահմանադրական ճանապարհով գնալ: Ինչ վերաբերում է Սահմանադրական փոփոխություններին կողմ լինելուն, ապա Վահրամ Բաղդասարյանն ասաց, որ եթե անհրաժեշտություն լինի, և դա միտված լինի երկրի զարգացմանը, ապա դրան չեն կարող կողմ չլինել։
«Մենք պետք է այնպիսի խորհրդարան ձևավորենք, որտեղ լինի իրական ընդդիմություն, դրա համար ժամանակ է պետք, որ քաղաքական ուժերը կարողանան նախապատրաստվել»,-ասաց նա և նշեց, որ դեռ պետք է ընտրական փոփոխությունները քննարկեն, և շուտափույթ կազմակերպման դեպքում քաղաքական ուժերը հնարավորություն չեն ունենա նախապատրաստվելու ընտրություններին:
«ՀՀԿ» խմբակցության ղեկավարը նշեց, որ իրենց քայլերը լինելու են ընտրություններին նախապատրաստվելը. հերթական թե արտահերթ՝ բանակցությունները ցույց կտան:
«Մենք լիարժեք քաղաքական պառլամենտ պետք է ունենանք, որ իշխանությանը հարիր ընդդիմություն ձևավորվի, և դրա համար ժամանակ է պետք, և ոչ թե ոգևորության, այլ ճիշտ գնահատականների արդյունքում խորհրդարան պետք է ձևավորվի»,- ասաց նա:
Ամեն դեպքում, Վահրամ Բաղդասարյանը քննարկումների մեկնարկը հաջող համարեց, նշեց, որ առաջարկություն չեն արել և եկել են համաձայնության հետագա հանդիպումների շուրջ:
Մանրամասների վերաբերյալ նա նշեց, որ դա իր և վարչապետի գաղտնիքը թող մնա, քանի որ քննարկումները չեն ավարտել: Նա ընդգծեց, որ ինքը բանակցում էր խմբակցության 49 անձանց անունից:
«Պետք է հնարավորություն և ժամանակ տրվի քաղաքական ուժերին, որ նախապատրաստվեն նոր ընտրություններին»,- ասաց նա և նշեց, որ եթե քննարկման արդյունքում լինի անհրաժեշտություն՝ այդ ճանապարհով կգնան:
Հարցին՝ մտավախություն չունի, որ ժողովուրդը դուրս կգա փողոց, Վահրամ Բաղդասարյանն ասաց, որ այդ ամբողջ պատասխանատվությունը իշխանությունն է կրում:
«Փողոց դուրս գալով պառլամենտ չեն ձևավորում»,- ասաց նա:
Տեսանյութը՝ ստորև
Աղբյուրը՝ news.am
