Էջմիածնի քաղաքապետի ժամանակավոր պաշտոնակատար Դիանա Գասպարյանը ֆեյսբուքյան իր էջում անդրադարձել է իր անձնական էջում տարիներ առաջ արված գրառմանն ու դրա շուրջ համացանցում բարձրացված աղմուկին.
«Սիրելի՛ համաքաղաքացիներ,
Տարածվել է 2012 թվականին ֆեյսբուքյան անձնական էջում արված իմ մի գրառում՝ համատեքստի հետ բացարձակապես կապ չունեցող սադրիչ վերնագրերով։
Սա շատ լավ առիթ է հանրությանը ներկայացնելու իմ պաշտոնական դիրքորոշումն այս կարևոր հարցի վերաբերյալ։
Նախ, ես պաշտոնապես հայտարարում եմ, որ Հայաստանյայց առաքելական սուրբ եկեղեցու դավանորդ եմ՝ մկրտված 2009 թվականին։
Երկրորդ,ես լիովին ճանաչում եմ Հայաստանյայց առաքելական սուրբ եկեղեցու՝ որպես ազգային եկեղեցու բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում։
Երրորդ, որպես քաղաքապետի պաշտոնակատար իմ գործունեության առաջին օրից սերտորեն համագործակցել եմ Մայր Աթոռի հետ՝ հպարտությամբ գիտակցելով իմ քաղաքի առանձնահատուկ դերը ողջ հայության համար։
Ինչ վերաբերում է իմ անձնական էջում կատարված գրառմանը, ապա այն առավելագույնը կարող էր համարվել երիտասարդ տարիներին արված անհաջող կատակ, որի շահարկումն այս նախընտրական շրջանում ոչ այլ ինչ է, քան բացահայտ սադրանք և հակաքարոզչություն»։
Կարդացեք նաև՝ «Աստված չկա». Էջմիածնի քաղաքապետի պաշտոնակատար Դիանա Գասպարյանի սկանդալային հայտարարությունը
