Ախալցխայում ձերբակալվել է Պակիստանի 37–ամյա քաղաքացի, որը հայկական դպրոցի հարակից փողոցում հետեւել է դպրոցից դուրս եկող աղջիկներին: Այս մասին հայտնում է akhaltskha.net-ը։
Տվյալ տղամարդը Ախալցխայում աշխատում էր սննդի կետերից մեկում եւ ապրում էր ինչ-որ հյուրանոցում:
Մի քանի օրվա ընթացքում թվով 7 աղջիկները հայտնվել են կալանավորվածի հետապնդման թիրախում: Նրանք արդեն ծնողների հետ միասին վկայություն են տվել իրավապահներին:
Դպրոցի հարեւանությամբ ապրող քաղաքացիներից մեկի խոսքերով՝ դեպքը պատահել է քաղաքի հայկական դպրոցի փողոցում, երբ դպրոցական աղջիկները մի քանի օրերի ընթացքում նկատել են նրանց հետեւող 37 ամյա տղամարդուն:
«Աղջիկները կատարվածի առիթով տեղեկացրել են իրենց ծնողներին, ինչի արդյունքում ծնողները սկսել են հետեւել եւ թաքուն նկարահանել երեխաներին հետեւող տղամարդուն: Վերջապես բավարար փաստեր կուտակելով աղջիկների ծնողները դիմել են իրավապահ մարմիններին, ովքեր հայտնաբերել եւ ձերբակալել են տղամարդուն: Պարզվել է, որ 37 ամյա տղամարդը Պակիստանի քաղաքացի է եւ ապրում էր Ախալցխայի հյուրանոցներից մեկում»,-պատմում է դեպքին ծանոթ քաղաքացին:
