Առանց լայն հանրային քննարկման, առանց հանրային համաձայնության՝ որևէ հարկային բեռի ավելացում չի լինելու, այսօր՝ նոյեմբերի 19-ին, Կառավարության արտահերթ նիստում հայտարարեց ՀՀ առաջին փոխվարչապետի պաշտոնակատար Արարատ Միրզոյանն՝ անդրադառնալով «խոպանչիներին հարկելու» մասին նախագծին։
«Բացառվում է այդպիսի բան։ Պետք է հաշվի առնել՝ զանազան գաղափարներ կարող են քննարկվել, ընդ որում, քննարկումներ հաճախ կարող են մանիպուլատիվ տեսք ստանալ, կարող են աղավաղվել և մեկնաբանվել ոչ այնպես, ինչպես կա, բայց կարող են և մեկնաբանվել այնպես, ինչպես կա ու արժանանալ կամ չարժանանալ մարդկանց հավանությանը: Միայն հանրային լայն համաձայնության դեպքում կարող են նման նախաձեռնությունները կյանքի կոչվել։
Առաջին փոխվարչապետի խոսքով՝ «խոպանչիներին հարկելու» նախաձեռնության դեպքը աղավաղվել է ու սխալ մեկնաբանվել։
«Գաղափարը հետևյալն է՝ կա միտք՝ ներդնել եկամուտների համընդհանուր հայտարարագրման համակարգ, որտեղ պետք է բոլոր քաղաքացիները հայտարարագրեն իրենց եկամուտները»,- ասաց նա։
