ՀՀ Ազգային Ժողովում շրջանառության մեջ դրված ցեմենտի ներմուծման համար պետական տուրք նախատեսող օրենքի նախագծի համաձայն սահմանվում է քսաներկու հազար ՀՀ դրամ պետական տուրք ԱՏԳ ԱԱ 2523 (բացառությամբ սպիտակ ցեմենտի և կլինկերի) ապրանքային դիրքի ծածկագրին դասվող ցեմենտի մեկ տոննայի ներմուծման համար:
Համոզված ենք, որ տեղական արտադրողների համար սա չափազանց կարևոր նշանակություն ունեցող օրենքի նախագիծ է և որոշակիորեն պաշտպանում է տեղական արտադրողին:
Ցեմենտի արտադրությունը ռազմավարական նշանակություն ունի պետության համար և Հայաստանի Հանրապետությունում ցեմենտի սպառումը Իրանից ներմուծման միջոցով իրականացնելը հղի է վտանգավոր հետևանքներով, քանի որ հավանական է, որ ոչ հեռավոր ապագայում Իրանից ցեմենտ հնարավոր չլինի ներմուծել էժան գներով, և եթե տեղական արտադրողները ներկայումս չպաշտպանվեին պետության կողմից, գործարանները կփակվեին, իսկ հետագայում Իրանական ցեմենտի թանկացման ժամանակ այլևս հնարավոր չի լինի նորից գործարաններ բացել կամ կպահանջվի երկար ժամանակ և տնտեսության համար ավելի մեծ բացասական հետևանքները անխուսափելի կլինեն:
Մեր ընկերությունը չափազանց բարձր է գնահատում տեղական արտադրողներին պաշտպանելու և աջակցելու պետության ներկայիս պատրաստակամությունը և հուսով ենք, որ ԱԺ տնտեսական հարցերի մշտական հանձնաժողվի կողմից առաջարկված փոփոխություններով օրենքների նախագծերը կընդունվեն Ազգային Ժողովի կողմից: Իհարկե արդյունավետ կլիներ, որ 22000 դրամ պետական տուրքի փոխարեն սահմանվեր 30000 հազար դրամ, քանի որ այս օրենքի ընդունումից հետո պետական աջակցության շնորհիվ Իրանում հնարավոր է կրկին ցեմենտի գինը որոշակիոեն իջեցվի/համոզված ենք իհարկե ժամանակավոր/: Բացի այդ, օրենքի գործողությունը որևէ ժամկետով սահմանափակելու դեպքում գործարանները զարգացնելուն ուղղված լրացուցիչ ներդրումներ կատարելը կլինի չափազանց ռիսկային և փաստացի հնարավոր չի լինի կատարել նոր ներդրումներ՝ կայունության բացակայության պատճառով:
Արարատի ցեմենտի գործարանը ակնկալում է պետությունից միայն իրեն պաշտպանող պետական քաղաքականություն և այլ արտադրողների օրինական շահերի ոտնահարում: Մասնավորապես, կարծես թե պետությանը սպառնում են նրանով, որ իրենք էլ կարող են կլինկեր ներմուծել և այդ եղանակով արտադրել ցեմենտ, սակայն անկեղծ չեն, քանի որ իրականում այդ գործարանի համար ցեմենտի ինքնարժեքը ավելի ցածր պետք է լինի, քան կլինկերի ներմուծման միջոցով ցեմենտ արտադրողի:
Բացի այդ, 2018թ. մայիս ամսին, երբ ՊԵԿ-ում քննարկում էր կազմակերպվել ներմուծվող ցեմենտի մաքսազերծման և տեղական արտադրողին պաշտպանելու հետ կապված հարցերի հետ կապված, տեղական մյուս արտադրողները, այդ թվում՝ Արարատցեմենտ ընկերությունը առարկություններ չունեին և համակարծիք էին, որ կլինկերը պետք է դիտարկվի որպես հումք: Ավելին, նշվում էր, որ իրենք նույնպես կլինկերի ներմուծման միջոցով ցեմենտի արտադրություն են հիմնելու Մեղրիում:
Իսկ ներկայումս մեր համոզմամբ Արարատցեմենտ ընկերության գործողությունները մանիպուլյատիվ են, հետապնդում են նեղ անձնական շահեր և նպատակը մեկն է. այնպես անել,որ կլինկերի ներմուծման միջոցով ցեմենտ արտադրող գործարանը փակվի և նորերը չբացվեն:
Հարգանքով՝ «ԳԱՋ» ՓԲԸ տնօրեն Ա. Ենգոյան