Այսօր Ամենայն Հայոց կաթողիկոս Գարեգին Բ-ի գլխավորությամբ տեղի է ունեցել ոտնլվայի արարողություն:
Ինչպես հայտնի է՝ Ս․ Հարության տոնի նախընթաց շաբաթը կոչվում է Ավագ Շաբաթ և հետևաբար այդ շաբաթվա հինգշաբթի օրը կոչվում է Ավագ Հինգշաբթի։ Ավագ Շաբաթը բավական հագեցած կրոնա-ծիսական ընթացակարգ ունի։ Այսօր հաստատվում է Սուրբ Հաղորդության խորհուրդը, քանի որ Ավագ Հինգշաբթի է տեղի ունենում Վերջին կամ Խորհրդավոր Ընթրիքը, կատարվում ոտնլվայի արարողությունը: Քրիստոսը, վերջին ընթրիքից հետո ցուցաբերելով ճշմարիտ հեզության ու խոնարհության օրինակ, լվանում է իր աշակերտների ոտքերը:
Այդպես էլ Հայ եկեղեցում Տիրոջ այս օրինակով քահանան եկեղեցու խորանին ծնկաչոք լվանում է 12 մանուկների կամ եկեղեցու սպասավորների ոտքերը և օծում օրհնված յուղով: Ավագ հինգշաբթի երեկոյան կատարվում է Խավարման կարգ, որը վերաբերում է Ավագ Ուրբաթին՝ խորհրդանշելով Տիրոջ խաչելությունն ու թաղումը:
