Մայիսի 19-ին, ժամը 13:03-ին «911» ծառայությանը տեղեկություն էր հաղորդվել, որ Երևան քաղաքի Ա. Սպենդարյանի անվան օպերայի և բալետի ազգային ակադեմիական թատրոնի շենքում ռումբ է տեղադրված. անհրաժեշտ է փրկարարների օգնությունը:
Դեպքի վայր ժամանած ոստիկանության և Արտակարգ իրավիճակների նախարարության ծառայողները օպերային թատրոնի շենքից որեւէ ռումբ չեն հայտնաբերել․ ահազանգը կեղծ էր:
Նշենք, որ դեպքի վայր էին մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ, հատուկ նշանակության փրկարարական աշխատանքների իրականացման կենտրոնի փրկարարական ջոկատը, կինոլոգիական խումբը, Ճգնաժամային կառավարման ազգային կենտրոնի օպերատիվ և արտակարգ իրավիճակների արձագանքման խմբերը, հոգեբանական աջակցության բաժնի հրահանգիչը և քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական ջոկատը:
Ալ. Սպենդիարյանի անվան օպերայի և բալետի ազգային ակադեմիական թատրոնի տնօրենի պաշտոնակատար Կարինե Կիրակոսյանը լրատվամիջոցներին ասել է, որ թատրոնում այսօր քիչ թվով աշխատակիցներ կային․եկել էին նրանք, ովքեր մասնակցում են երեկոյան թատրոնում նախատեսված ներկայացմանը:
Ի դեպ, այսօր երեկոյան, ըստ խաղացանկի, օպերային թատրոնում պետք է ընթանա «Գայանե» բալետը։