Տեղեկացրել էինք, որ համացանցում տեսանյութ է տարածվել, ըստ որի Վանաձոր-Դիլիջան ճանապարհահատվածում ջրափոսերի մեջ ասֆալտ են փռում։
Տրանսպորտի, կապի և տեղեկատվական տեխնոլոգիաների նախարարությունից պարզաբանում են, որ Վանաձոր-Դիլիջան ճանապարհահատվածում մինչև հիմնանորոգումն
սկսելը կատարվում են ժամանակավոր անցանելիության ապահովման աշխատանքներ։
«Վանաձոր-Դիլիջան ճանապարհի անցանելիության ապահովմանն ուղղված աշխատանքների վերաբերյալ վերջին օրերին տարածվում են տարբեր հրապարակումներ և մեկնաբանություններ:
Այդ առիթով պարզաբանում ենք. Վանաձոր-Դիլիջան ճանապարհը գտնվում է այս տարվա հիմնանորոգման ծրագրում, հետևաբար այն ընթացիկ պահպանության ծրագրում ներառված չէ: Այստեղ փոսային նորոգումներ նախատեսված չեն:
Հաշվի առնելով, որ հիմնանորոգման աշխատանքները նախատեսվում է մեկնարկել հունիսի կեսին, շինարարին առաջարկվել է որպես ժամանակավոր լուծում իրականացնել անցանելիության ապահովման աշխատանքներ՝ մինչև հիմնանորոգման մեկնարկը:
Հանրապետությունում վերջին օրերին տեղացող անձրևների պայմաններում շինարարը համապատասխան տեխնիկայի միջոցով կատարում է փոսերի տեղային չորացում:
Հիմնանորոգման աշխատանքներից առաջ առկա ասֆալտբետոնե ծածկը ամբողջովին փոխարինվելու է նոր ծածկով: Տարածաշրջանը սպասարկող ընկերությունն այդ աշխատանքները իրականացնում է իր միջոցներով»,-նշվում է պարզաբանման տեքստում:
