Երեւան-Երասխ ճանապարհին հուլիսի 6-ին տեղի ունեցած ողբերգական վթարից հետո Երեւանի Ճառագայթային բժշկության և այրվածքների հանրապետական գիտական կենտրոն տեղափոխված 20-ամյա Ծաղիկ Համբարձումյանը մահացել է:
Տեղեկությունը հաստատել է ՀՀ առողջապահության նախարարի մամուլի խոսնակ Ալինա Նիկողոսյանը՝ հայտնելով, որ աղջիկը 4 օր շարունակ գտնվում էր ծայրահեղ ծանր վիճակում:
ԲԿ վերակենդանացման բաժանմունքի վարիչ Կարինե Բաբայանն էլ նշել է, որ նրա ստացած վնասվածքներն անհամատեղելի էին կյանքի հետ:
Նշենք, որ երիտասարդ աղջիկը Արարատի մարզի Երասխ գյուղի բնակիչ էր:
Այսպիսով, ողբերգական վթարից մահացածների թիվը հասավ 7-ի: Մյուս տուժածներից 2-ի վիճակը շարունակում է մնալ ծանր:
Հիշեցնենք, Արարատի մարզում՝ Զոդի կամրջի վրա տեղի ունեցած ավտովթարի հետևանքով տեղում զոհվել էր 6, վիրավորվել՝ 12 մարդ:
