«Ընտրվել է «Իմ քայլը դաշինքը»: Երբ ասում են՝ փորձառու կադրեր չեն, ես ուզում եմ հարցնել՝ էդ փորձառու կադրերը չէի՞ն, որ կործանել էին երկիրը: Ինչի՞ մեջ է պետք լինել փորձառու: Մենք էն, ինչ ուզում ենք անել, անում ենք, երիտասարդ բառն էլ այնքան չեմ ընդունում, 25 տարին լրացած ցանկացած անձ կարող է լինել պատգամավոր, նախարար եւ այլն, նայենք սահմանադրությամբ: Քաղաքական երիտասարդությունը դա ուրիշ կատեգորիա է:
Այս մասին վարչապետ Նիկոլ Փաշինյանը այսօր՝ հուլիսի 17-ին, հայտարարեց «Ազատությանը» տված հարցազրույցում՝ պատասխանելով հարցին, թե շատ են մեղադրում իրենց թիմին՝ երիտասարդ եւ անփորձ լինելու մեջ:
«Մեզնից առաջ քանի երիտասարդներ են եղել, որ փորձել են իրականացնել իշխանափոխություն, բայց չեն կարողացել:
Այդ նշված երիտասարդների թիմն արել է այն, ինչ արել է, եւ երկրորդ փուլով կանի տնտեսական հեղափոխություն: Սա չի նշանակում, որ բոլորն իդեալական են: Ինձանից սկսած, թիմի բոլոր անդամներով վերջացրած բոլորն էլ սխալական են, էստեղ կարեւոր է՝ մենք մեր գաղափարին նվիրվա՞ծ ենք, թե՞ ո»չ:
Վարչապետը գո՞հ է արդյոք իր քաղաքական թիմից հարցին ի պատասխան նշեց, որ ինքն անգամ հենց իրենից գոհ չէ, հետեւաբար թիմից էլ գոհ լինել չի կարող:
«Նրանք, ովքեր երբեւէ աշխատել են ինձ հետ, կիմանան, որ ես երբեք գոհ չեմ լինում, ինքս ինձնից էլ ես գոհ չեմ եւ չեմ լինի, գուցե սա վատ է, բայց այդպես է»:
