Օրերս Շուշիում տեղի է ունեցել «Հակոբ Գյուրջյան» քանդակագործության չորրորդ միջազգային սիմպոզիումը: Ավանդական դարձած միջոցառումը հերթական անգամ համախմբել է աշխարհի տարբեր երկրներից Արցախ ժամանած քանդակագործների, ովքեր 20 օր շարունակ շունչ ու ոգի են տվել քարին:
Արտասահմանից Արցախ ժամանած քանդակագործների թվում է եղել շատերին որպես «Վիքիպեդիա»-ի քանդակի հեղինակ հայտնի Միհրան Հակոբյանը:
«Քանդակը կոչվում էր «Անհաղթը» և խորհրդանշում է այն մարդկանց, ովքեր անկախ հանգամանքներից՝ չեն հանձնվում, կառչում են իրենց երազանքներից, հողից, քարից ու մնում են կանգուն»,-Asekose.am-ի թղթակցի հետ զրույցում ասաց արմատներով արցախցի քանդակագործը՝ տեղեկացնելով, որ քանդակը մնալու է Շուշիի կերպարվեստի թանգարանի բակում:
Խոսելով առաջիկայում սպասվող աշխատանքների մասին քանդակագործը նշեց, որ ցանկություն ունի ապրիլյան պատերազմը ներկայացնող ինչ-որ բան քանդակել.
«Նույնիսկ անվճար կանեմ այս աշխատանքը, եթե օգնեն կազմակեպչական, տեխնիկական հարցերում»,-նկատեց Միհրան Հակոբյանը:
Նշենք, որ շուշեցի աշխարհահռչակ արվեստագետ Հակոբ Գյուրջյանի հիշատակին քանդակագործության միջազգային սիմպոզիումն արդեն երրորդ անգամ է Շուշիում անցկացվում: Այս ընթացքում ստեղծվել է 42 քանդակ:
Հակոբ Գյուրջյանը հայ իրականության մեջ առաջինն է ստեղծել բազմաժանր արձանագործություն, օժտել այն թեմատիկ բազմազանությամբ, գեղարվեստական ընդհանրացումներով և դուրս բերել համաշխարհային ասպարեզ: Նրա արվեստում ինքնատիպորեն միահյուսվել են Արևելքի հնագույն և եվրոպական նոր արվեստների ավանդույթները:
Անի Կարապետյան
