Առողջապահության նախկին նախարար,Երևանի պետական բժշկական համալսարանի ռեկտոր Արմեն Մուրադյանը ֆեյսբուքյան իր էջում գրում է.
«Գրելու տեղը միացեք՝ գործ շատ կա...
Երկար ժամանակ ճանաչում եմ և զբաղվում եմ Ալբերտի առողջական և մնացած այլ խնդիրներով, րոպեներ առաջ էլ նրա հիվանդասենյակում էի: Ի դեպ, նշեմ, որ բազմաթիվ կոնսիլիումներ են հրավիրվել Ալբերտի առողջական խնդրով, նշեմ, որ Ալբերտի խնդիրը ոչ միայն պայմանավորված է նրա ստացած վնասվածքով այլ բնածին արատով, որը նա ունի: Այո, կան դեպքեր, երբ բոլորս միասին պետք է ձեռք մեկնենք և սա այդ դեպքերից է:
Շնորհակալ եմ բոլոր նրանց, ովքեր արձագանքեցին Վիգեն Սարգսյանի կոչին: Ես և իմ ընկերները ևս միանում ենք Վիգեն Սարգսյանի կոչին և մեր ներդրումը կունենանք Ալբերտի առողջական խնդրի լուծման հարցում:
Նման դրամահավաքները /fundraising/ քաղաքակիրթ հասարակության հասունության հայելին են և բոլոր զարգացած հասարակություններում ընդունելի են և կիրառվում են:
Զազրելի է, երբ դրամահավաքը՝ ի նպաստ հայ Զինվորի դիտարկվում է որպես «բոշայություն» , եթե այդպես է ապա շուրջ մեկ տարի ես և իմ ընկերներն ամեն օր զբաղված ենք «բոշայությամբ» և դրանով հպարտանում ենք: Անկախ կոչումներից, պաշտոններից, կարգավիճակից մարդիկ պատիվ են համարել մասնակիցը դառնալ մեր խաղաղության երաշխավորների խնդիրների լուծմանը՝ մենք պարտք ենք նրանց:
Համատեղ և միասնական աշխատանքի արդյունքում օրեր անց ունենալու ենք տարածաշրջանում լավագույն վերականգնողական կենտրոնը:
Գրում եմ հազվագյուտ՝ նախընտրելով գործը»:
Նշենք, որ ֆեյսբուքյան օգտատերերից մեկը Վիգեն Սարգսյանի կոչը՝ միանալ դրամահավաքին և օգնել զինծառայող Ալբերտ Դալլաքյանի բուժումն արտերկրում կազմակերպելու հարցում,հենց պաշտպանության նախարարի գրառման մեկնաբանություններում «բոշայություն» էր որակել, ինչին նախարարը պատասխանել էր՝ «բոշան դու ես»:
Ավելացնենք, որ Վիգեն Սարգսյանի գրառումը լայն քննարկման թեմա է դարձել համացանցում: Լրագրող Արթուր Հայրապետյանը, մասնավորապես, գրել է. «Վիգեն Սարգսյանն, ինչպես կբացատրի, թե ինչու է Ալբերտի գխին կրակած ու նրան մի քանի ամսով կոմայի մեջ գցած սպան ազատության մեջ ու հետն էլ մինչեւ հիմա աշխատում է։
Հ.Գ. ու այդ սպայի ենթակայության տակ այժմ քանի զինվոր կա...»:
Ստորև ներկայացնում ենք Ալբերտ Դալլաքյանի մոր խոսքը՝ Լրագրողներ հանուն մարդու իրավունքների իրավական կայքից:
Տեսանյութում Ալբերտի մայրը պատմում է, որ որդուն ծանր վիրավորած սպա Ավագ Նահապետյանը մինչ այժմ պատասխան չի տվել, քրգործի քննությունը դեռ շարունակվում է: Ավելին, նա շարունակում է աշխատանքը Հադրութի դիրքերում:
