Նորագույն պատմության մեջ մեր պառլամենտում ամենամեծ խայտառակությունն էր, երբ քաղաքական ուժերը մերժեցին կաթողիկոսին տրամադրել պաշտպանություն. այս մասին այսօր՝ նոյեմբերի 17-ին, լրագրողների հետ հանդիպման ժամանակ ասաց ՀՀԿ ԳՄ անդամ Սամվել Նիկոյանը։ 

«Մեր պառլամենտում ամենաամոթալի քվեարկությունն էր, որը տեղի ունեցավ։ Այսօր փառաբանվում են կրոնական և  սեռական փոքրամասնությունները: Սոցցանցերում համատարած հայհոյանք է,  մեկնաբանությունները պոռնոֆիլմերից չեն տարբերվում: Այս միջավայրում պետք է լինեն մարդիկ, որոնք ադեկվատ վարքագիծ պետք է դրսևորեն»,-ասաց նա։

Հարցին՝ «որոնք են այն պատճառները, որ եկեղեցին հիմա է հարձակման ենթարկվում», նա պատասխանեց. «Որովհետև վերջին իրադարձությունների արդյունքում ՀՀ-ում գործում է ամենաթողությունը»: 

Նիկոյանը հիշեցրեց, որ ամիսներ առաջ Վեհափառ հայրապետի դեմ բողոքի գործողություններ եղան. «Մի խումբ մարդիկ բռնություն իրականացրին Առաքելական եկեղեցու և Ամենայն Հայոց կաթողիկոսի հանդեպ: Դա մեր երկրում վերջին իրադարձությունների հետևանք էր և ուղղորդված էր քաղաքական առումով: Կարեն Պետրոսյանը նշանակվեց Գյումրիի տնտեսագիտական համալսարանի ռեկտոր: Պատահակա՞ն. որևէ բան պատահական չէ: Նրան պարգևատրեցին իր արած գործողությունների համար»: 

Սամվել Նիկոյանի կարծիքով՝ կաթողիկոսի հրաժարականը պահանջողները պատահական մարդիկ չեն. «Նրանք տարիներ շարունակ սնվել են գրանտներով: Կան քաղաքական ուժեր, որոնք դեմ են կաթողիկոսին պաշտպանություն տրամադրելուն այն ժամանակ, երբ դրա իրական անհրաժեշտությունը կա: Հայ առաքելական եկեղեցուն այսօր պետք է պաշտպանել սեռական եւ կրոնական փոքրամասնություններից: Եթե այսօր նրա վրա կան հարձակումներ նման փոքրամասնությունների կողմից, ապա քաղաքական ուժը պետք է պաշտպանի նրան: Եթե տեսնում ենք սեռական փոքրամասնությունների խրախճանք, ապա մեր դիրքորոշումը հստակ պետք է լինի»:

Հիշեցնենք, որ երեկ  ԱԺ-ում չընդունվեց ՀՀԿ-ի այն օրինագիծը, որով առաջարկվում էր Ամենայն հայոց կաթողիկոսին հատուկ պահպանության տակ առնել և ապահովել նրա անվտանգությունը:

Կարդացեք նաև՝ Պետք է պատասխան տան այն ուժերը, որոնք սնում են աղանդավորների, սեռական փոքրամասնությունների քարոզ...